«Կոտորածները իրականացվել են ավելի քան 2 դար շարունակ, զոհվել են ավելի քան 23 միլիոն եզդի»,-այսօր լրագրողների հետ հանդիպման ժամանակ եզդիների դեմ կատարված խոշտանգումների մասին նշեց Եզդիների ազգային կոմիտե ՀԿ փոխնախագահ Սաշա Սուլթանյանը:
Նրա պնդմամբ հարձակման հեղինակն է տեղում իշխող Քուրդիստանի տեղական իշխանությունը.
«Եզդիների իրավունքները Իրաքում որեւէ ձեւ չեն պաշտպանվում: 2007թ. օգոստոսի 14-ին Իրաքում 4 եզդիական գյուղ է ոչնչացվել, որի արդյունքում սպանվել է ավելի քան 1000 եզդի: Եզդիների ոչնչացումը մինչ այժմ շարունակվում է: Համաձայն Իրաքի եզդիական մշակութային կազմակերպությունների հաղորդման Իրաքում ապրում է ավելի քան կես միլիոն եզդի, որը կազմում է Իրաքի բնակչության 2.5-ը»:
Հայաստանում բնակվող եզդիների հորդորով նրանք որոշել են դիմել ՀՀ կառավարությանը, սա միակ երկիրն է, որտեղ եզդիները կարողանում են իրենց մշակութային դեմքը պահպանել: Եզդիները վստահ են, որ ՀՀ արտգործնախարարությունն ու Սփյուռքի նախարարությունը կլուծեն իրենց հարցը: Կես միլիոն եզդի ապրում է Հայաստանում, Թուրքիայում, Սիրիայում եւ Վրաստանում:
Կարդացեք նաև
Եզդիների իրավունքների պաշտպանության միջազգային կազմակերպության նախագահ Միրզա Իսմաիլը նշել է, որ եզդիները հայերի հետ երկար տարիների պատմություն են կիսել, երկար ժամանակ գտնվել են նույն նվաճողի տիրապետության տակ: Հուսով են, որ Հայաստանի կառավարությունը կընդառաջի եզդիներին եւ օգնության ձեռք կմեկնի Իրաքում բնակվող եզդիներին ու ասորիներին:
Անժելա ՇԱՀՈՒՄՅԱՆ
