«Անթույլատրելի եմ համարում որևէ պաշտոնի մասին քննարկումը, երբ այդ պաշտոնում կա գործող անձ,տվյալ դեպքում խոսքը Արման Մկրտումյանի մասին է, ու այս պահին նման խոսակցություն վարելը տգեղ է»,-այսօր, ՀՀԿ ԳՄ նիստից առաջ լրագրողների հետ զրույցում այսպես արձագանքեց ԱԺ պատգամավոր, ՀՀԿ ԳՄ անդամ Դավիթ Հարությունյանը հարցին` ինչպե՞ս կմեկնաբանեք մամուլում հայտնված այն տեղեկությունները, որ Ձեզ պետք է նշանակեն Վճռաբեկ դատարանի նախագահ: «Բուն հարցին պատասխանելով ասեմ,որ նման որևէ քննարկում չի եղել»,- հավելեց Դավիթ Հարությունյանը:
Դիտարկմանը, որ եթե իրեն Վճռաբեկ դատարանի նախագահ դառնալու առաջարկ, այնուամենայնիվ, արվի՝ կընդունի՞, պատասխանեց. «Ես այդ հարցին արդեն պատասխանեցի: Ինչ վերաբերվում է ոլորտը փոխելուն, ես երբեք կաշկանդված չեմ եղել: Եթե հիշում եք՝ գործադիր իշխանությունում մեկ տարի, մինչև իմ պաշտոնավարման ավարտը, հայտարարել էի ,որ չեմ պատրաստվում շարունակել իմ աշխատանքը գործադիրում:Ինձ հետաքրքիր էր այլ աշխատանքով զբաղվել: Ու կարծում եմ՝ ես ունեմ անելիքներ օրենսդիրում զբաղվելու համար, այնպես որ ենթադրել, որ ես սպառել եմ ինձ այդ ոլորտում՝ ճիշտ չէ»:
Նելլի ԳՐԻԳՈՐՅԱՆ
