Երկրորդ օրն է՝ «ԹՈՒՄՈ» ստեղծարար տեխնոլոգիաների կենտրոնի խաղադաշտում ընթանում է «Սպորտը՝ հանուն հավասար հնարավորությունների» ֆուտբոլային մրցաշարը, որին մասնակցում են վեց թիմեր:
Մրցաշարի առաջին օրը նախնական փուլից հետո հայտնի դարձան կիսաեզրափակչի մասնակիցները, որոնք այսօր պայքարեցին եզրափակչի համար. ԹՈՒՄՈ-ն՝ «News.am»-ի, «Մեդիամաքսը»՝ «Չորրորդ իշխանության» հետ: Վաղը News.am-ը եւ «Մեդիամաքսը», կորոշեն հաղթողին, իսկ «Թումոն» եւ «Չորրորդ իշխանությունը» կխաղան 3-րդ տեղի համար:
Արդեն կայացած այս մարզական միջոցառման նախաձեռնող «Հույսի կամուրջ» հաշմանդամություն ունեցող երեխաների եւ երիտասարդների իրավունքների պաշտպանության ՀԿ ներկայացուցիչ, մրցաշարի կազմակերպիչ Արամ Մանուկյանը Aravot.am-ի հետ զրույցում ասաց. «Այս մրցաշարը նախկինում անցկացնում էինք «Միկա» մարզահամալիրում, որի համար որոշակի վարձավճար էինք մուծում: Այս տարի մեզ միացավ «ԹՈՒՄՈ» ստեղծարար տեխնոլոգիաների կենտրոնը եւ խաղերն այսօր ընթանում են նրա խաղադաշտում: Հասկանալի է՝ առանց որեւէ վճարի: Մրցաշարին ավանդաբար աջակցում է «Coca-Cola»-ն՝ թե ըմպելիքներով, թե ֆինանսապես՝ նաեւ առաջին երեք տեղերն զբաղեցնող թիմերի համար մրցանակներ սահմանելով: Այս անգամ տեխնիկական պատճառներով մրցավարության հարցով ՀՖՖ-ն չկարողացավ աջակցել: Բայց ոչ թե չցանկացավ, այլ մենք հայտն ուշացրինք ու ֆուտբոլի ֆեդերացիան տեխնիկապես խնդիրը լուծել չկարողացավ: Սակայն բացը կրկին լրացրեց «Coca-Cola»-ն եւ նախկին ֆուտբոլային մրցավարները նրա գումարային աջակցությամբ սպասարկում են հանդիպումները: Եվ վերջապես, կրկին մեզ հետ է մրցաշարի մշտական հովանավորը՝ Դանիայի Միացյալ Թագավորության դեսպանատունը»:
Արամ Մանուկյանի խոսքերով, հաջորդ տարվանից մրցաշարը ավելի հետաքրքիր է դառնալու: Մտադրություն կա, որպեսզի յուրաքանչյուր թիմի կազմում ընդգրկվի հաշմանդամություն ունեցող մեկ մարդ, որպեսզի «Սպորտը՝ հանուն հավասար հնարավորությունների» կարգախոսը միայն խոսքերով չլինի, որպեսզի չսահմանափակվի միայն հաշմանդամություն ունեցող մարդկանց խնդիրների լուսաբանում տարածելով:
Կարդացեք նաև
Աշոտ ՀԱԿՈԲՅԱՆ
