Վաղը Վազգեն Սարգսյանի անվան «Հանրապետական» մարզադաշտում կայանալիք աշխարհի առաջնության ընտրական փուլի Հայաստան-Բուլղարիա հանդիպման առիթով հրավիրված մամուլի ասուլիսում Հայաստանի ազգային հավաքականի գլխավոր մարզիչ Վարդան Մինասյանը կարեւորեց հանդիպման արդյունքը:
Նրա խոսքերով, բուլղարացիները խաղում են գրեթե առանց կորուստների: Ագրեսիվ եւ բարձր մոտիվացիա ունեցող թիմ է:
Անդրադառնալով թիմերի առաջին հանդիպմանը` գլխավոր մարզիչը նշեց, որ մեր տղաները տրվեցին սադրանքներին: «Վերջին օրերին լսում եմ, որ ագրեսիվ մտադրություններ կան: Մենք տղաներին փորձում ենք կենտրոնացնել խաղի վրա: Մեզ համար կարեւորը լինելու է հաշիվը եւ ուրիշ ոչինչ: Ավելորդ բաները մեզ կխանգարեն», – ասաց գլխավոր մարզիչը եւ թվարկեց եւս մի քանի պատճառ, որոնք մոտիվացնում են Հայաստանի հավաքականին:
Մենք խմբից դուրս գալու չնչին շանս ունենք եւ պետք է դա օգտագործենք:
Կարդացեք նաև
Սա ընտրական խաղ է, որում պետք է ձգտենք հաղթել:
Մենք Հայաստանում հաղթանակ չենք տոնել:
Վարկանիշի խնդիր կա: Հաջորդ վիճակահանությունից առաջ Հայաստանը 4-րդ զամբյուղում է եւ առաջիկա խաղերում հաջող հանդես գալու դեպքում կբարձրանանք 3-րդ զամբյուղ:
Խոսելով հրավիրված ֆուտբոլիստների պատրաստվածության մասին` գլխավոր մարզիչը նշեց, որ հրավիրվել են 20 ֆուտբոլիստներ, Արթուր Եդիգարյանը դեղին քարտ ունի եւ խաղին չի մասնակցելու, Կառլեն Մկրտչյանը Դանիայի հետ հանդիպումից հետո խաղային շատ քիչ ժամաքանակ է ունեցել, սակայն ֆունկցիոնալ վիճակը բավարար է, իսկ Ռոման Բերեզովսկին առաջին մարզումներից հետո այնքան էլ լավ չէր, սակայն վերջին մարզումը ցույց տվեց, որ նա 100 տոկոսով պատրաստ է խաղին:
Աշոտ ՀԱԿՈԲՅԱՆ
