Ազգային ժողովը քննարկում է նաեւ Վերահսկիչ պալատի նախագահի հարցը: Հիշեցնենք, որ նախագահ Սերժ Սարգսյանը խորհրդարանի հաստատմանն է ներկայացրել ՎՊ նախագահի պաշտոնում Իշխան Զաքարյանի թեկնածությունը, ում պաշտոնանկության մասին ամիսներ շարունակ խոսվում էր: Պատճառը` Զաքարյանի ղեկավարած մարմնի հայտնաբերած բյուջետային չարաշահումների մասին փաստերն էին, որոնք, իբրեւ նախագահի սրտովն այդքան էլ չեն եղել:
ԲՀԿ խմբակցության քարտուղար Նաիրա Զոհրաբյանն Իշխան Զաքարյանից հետաքրքրվեց՝ ի՞նչ է անհրաժեշտ ՎՊ-ին բացահայտումները վերջնական ավարտին հասցնելու համար: «Բոլորիս համար ակնհայտ է, որ ինչ բացահայտում էլ անի Վերահսկիչ պալատը, ինչ-որ մի օղակում այնուհանդերձ դա ընդհատվում է: Պատասխանատվության են ենթարկվում մանր պաշտոնյաները: Հիմա դուք օրինակ կբերեք Խաչիկյանին, բայց Խաչիկյանին պետք է սարքել թանգարանային էքսպոնատ: Ի՞նչ գործիքներ են պակասում Վերահսկիչ պալատին, որ կարողանա գործընթացը մինչև վերջ հասցնել, բռնել իրական գանձագողերի ձեռքը, ոչ թե նրանց, ովքեր կատարողներ են եղել»,- հարցրեց Նաիրա Զոհրաբյանը: Ի պատասխան՝ Իշխան Զաքարյանը նշեց, որ աշխատում են նշված գործընթացները վերջնական տրամաբանությանը հասցնելու ուղղությամբ: Ըստ նրա, եթե կա որոշակի բացահայտում, կա մեկ ճանապարհ՝ դա դատական իշխանություններին դիմելն է. «Այս ճանապարհն է, նոր մոտեցում, նոր գործիք, ցավոք սրտի, էս պահին առաջարկել չենք կարող»:
Նաիրա Զոհրաբյանը հիշեցրեց այն, որ բոլորն ականատես եղան, թե կառավարությունն ինչպես արձագանքեց ՎՊ վերջին բացահայտումներին. «Ձեր վերջին փաստերը նրանք համարեցին ուղեղի մորմոք: Էլի լինելու են բացահայտումներ, բայց ինչ-որ մի օղակում դրանք ընդհատվելու են»:
Նելլի ԳՐԻԳՈՐՅԱՆ
