Սյունիքի նախկին փոխմարզպետ Արա Դոլունցն իր փոխմարզպետի պաշտոնից ազատվելու հանգամանքով է բացատրում Գորիսի պետական համալսարանի կառավարման խորհրդի անդամությունից ազատվելը:
«Որովհետեւ ես արդեն նախկին փոխմարզպետ եմ»,- համալսարանից հեռանալու պատճառը Aravot.am-ին այսպես բացատրեց Արա Դոլունցն ու շնորհակալություն ասելով հարցի համար՝ անջատեց հեռախոսը:
Գորիսեցիները համալսարանի կառավարման խորհրդից Սյունիքի նախկին մարզպետ Սուրիկ Խաչատրյանի հեռանալու հետ են կապում նաեւ նրա երբեմնի տեղակալ Արա Դոլունցի եւ հորեղբորորդու` «Որոտանի» ՀԷԿ-երի կասկադի տնօրեն Սասուն Խաչատրյանի` խորհրդի անդամությունից ազատվելը:
Գորիսի պետական համալսարանի ռեկտոր Յուրա Սաֆարյանը մեզ հետ զրույցում ասաց, որ երեքն էլ հեռացել են կառավարության որոշմամբ. «Կառավարության որոշմամբ են նշանակվել, փոփոխությունն էլ կառավարության ` դեկտեմբերի 26-ի որոշմամբ է եղել: Երեւի փոփոխությունը կապված է ՀԷԿ-երի համակարգի մասնավորեցման եւ Արա Դոլունցի` փոխմարզպետի աշխատանքից հեռանալու հետ»:
Կարդացեք նաև
Պարոն Սաֆարյանի կարծիքով, փոփոխությունները համալսարանի կառավարման խորհրդի նախագահի փոփոխության հետ կապ չունեն: Նա ասաց, որ խորհրդի կազմում 24 հոգի կա եւ ինքը չգիտի` ով ում բարեկամն է:
Հիշեցնենք, որ Գորիսի պետական համալսարանում հունվարի 16-ին կայացած կառավարման խորհրդի նիստի ժամանակ նախկին մարզպետ Սուրիկ Խաչատրյանի փոխարեն խորհրդի նախագահ ընտրվեց Սյունիքի գործող մարզպետ Վահե Հակոբյանը:
Արփինե ՍԻՄՈՆՅԱՆ
