Այսօր Շիրակի մարզի ընդհանուր իրավասության դատարանում ժամը 13.00-ին նշանակված էր Վարդան Ղուկասյանի դստեր փեսացուի` Կարեն Եսայանի սպանության գործով դատական նիստը, որն արդեն մոտենում է ավարտին: Դատախազ Արմեն Մարուքյանը պատրաստվում է հանդես գալ մեղադրական ճառով` պատժաչափ պահանջելով սպանության մեջ մեղադրվող Հարություն Սարգսյանի համար, սակայն նիստը մի քանի անգամ տարբեր պատճառաբանություններով հետաձգվում է. մեկ ամբաստանյալի առողջական վիճակն է վատանում, մեկ դատական նիստի օրը փաստաբանների հետ չի համաձայնեցվում:
Այսօր ևս դատական նիստը չկայացավ, սակայն պատճառը ոչ թե դատախազի կամ փաստաբանների բացակայությունն էր, այլ Հարություն Սարգսյանի հիվանդ լինելը: Ամբաստանյալին ԱԱԾ-ի հատուկ պահպանման վայրից տեղափոխել էին Ախուրյան, սակայն դատը սկսվելուն պես նրան ուղեկցող ոստիկանը զեկուցեց, որ նա բարձր ջերմություն ունի, բարձր է նաև արյան ճնշումը, շտապօգնություն է եկել, ու բժիշկը դեղ ներերակելուց հետո խորհուրդ է տվել ամաբաստանյալին դատարան տեղափոխել լավ զգալուց հետո:
Տուժողի իրավահաջորդի փաստաբան Վարդուհի Էլբակյանը, ով, ի դեպ, ոչ բոլոր դատական նիստերին է ներկայանում, հետաքրքրվեց, թե կա՞ բժշկի համապատասխան տեղեկանքն այն մասին, որ Հարություն Սարգսյանը չի կարող ներկայանալ դատարան: Այստեղ սկսվեց վիճաբանություն Վարդուհի Էլբեկյանի ու ոստիկան Պողոսյանի միջև: Դատավորը ստիպված եղավ նիստը հետաձգել կես ժամով, մինչև որ ոստիկանը կներկայացներ տեղեկանքը:
Կարդացեք նաև
Վիճաբանությունը տեղափոխվեց դատարանի միջանցք, որտեղ և տուժողի իրավահաջորդի շահերը ներկայացնող Արմեն Մելքոնյանն ու ամբաստանյալ Հարություն Սարգսյանի հայրը` Անիի նախկին ոստիկանապետ Սամվել Սարգսյանը մազ էր մնացել, որ իրար ծեծեին: Տուժողի իրավահաջորդի ներկայացուցչի ու Հարություն Սարգսյանի քրոջ միջև լեզվակռիվ ծագեց Հարությունի բարձր ջերմություն ունենալ-չունենալու շուրջ, որն է վերածվեց փոխադարձ վիրավորանքների ու ճչոցների: Դատարանի կարգադրիչներին հաջողվեց շտկել իրավիճակը, կանխել ծեծկռտուքը, սակայն դատը մինչև աշխատանքային օրվա ավարտը մի քանի անգամ ժամերով հետաձգվեց:
Երբ այն նորից սկսվեց, ամբաստանյալի փոխարեն դատարան ներկայացավ ոստիկանը`այս անգամ իր հետ բերելով բժշկի համապատասխան գրառումներն այն մասին, որ հիվանդը վատառողջ լինելու, գլխացավ, գլխապտույտ ունենալու ու նյարդային վատ վիճակում գտնվելու պատճառով չի կարող ներկայանալ դատական նիստին: Սա դարձավ վիճանաբանության մի նոր թեմա, քանի որ չկար բժշկի ստորագրությունը:
Դատախազ Արմեն Մարուքյանը դատարանին միջնորդեց պաշտոնապես շտապօգնություն ուղարկել Ախուրյանի ժամանակավոր պահպանման խուց ` հետազոտելու ամբաստանյալին ու համոզվելու`իրո՞ք նա հիվանդ է: Վերջինիս հիվանդ լինելը կասկածահարույց թվաց դատախազին ու տուժողի իրավահաջորդի շահերը պաշտպանողներին:
Դատարանը բավարարեց դատախազի միջնորդությունը`դատը հետաձգելով ևս մեկ ժամով,որը փաստորեն համընկնում էր աշխատանքային օրվա ավարտի հետ:
Նունե ԱՐԵՎՇԱՏՅԱՆ
