Վիկտոր Յանուկովիչի հրամանագրով փետրվարի 20-ը Ուկրաինայում սգո օր է հայտարարվել:
25 զոհ, շուրջ 400 վիրավոր, մի քանի տասնյակ այրված մեքենա` այդ թվում ոստիկանությանը պատկանող երկու զրահամեքենա, մի քանի լրջորեն վնասված շինություն: Այսպիսին են երեկ կեսօրին սկիզբ առած կիևյան բախումների արդյունքները:
Սպանվածներից 7-ը ոստիկանության աշխատակիցներ են: 25 զոհերից մեկը Կիևում լույս տեսնող «Վեստի» պարբերականի լրագրող Վյաչեսլավ Վերեմին է: Վիրավորներից հինգը ևս լրագրողներ են:
Այս պահին բախումները Կիևի կենտրոնական Անկախության հրապարակում՝ Եվրոմայդանում շարունակվում են, մի հատվածում կենտրոնացել են ոստիկանության ուժերը, մյուսում` մոտ 20 հազար ցուցարարներ: Կողմերից և ոչ մեկը, սակայն, առայժմ որևէ կտրուկ քայլի չի դիմում:
Կարդացեք նաև
Ուկրաինայի մայրաքաղաքը գրեթե կաթվածահար վիճակում է` մետրոն չի գործում, քաղաք տանող ճանապարհները փակ են, կենտրոնական թաղամասերը ևս գտնվում են ոստիկանության ուժեղացված հսկողության ներքո:
Մի քանի ժամ առաջ էլ հայտնի դարձավ, որ Դնեպրոպետրովսկում գտնվող դեսանտային բրիգադը երկրի պաշտպանության նախարարի հրամանով տեղափոխվել է Կիև: Նման քայլի պաշտոնական վարկածը «մայրաքաղաքում գտնվող զինապահեստների պաշտպանությունն է»:
Երեկ ողջ օրվա ընթացքում ընդդիմության կողմնակիցները դիմադրում էին մի քանի ուղղությամբ առաջացող հատուկ ջոկատայիններին ու ներքին զորքերի զինծառայողներին: Ուշագրավ է,որ ուկրաինական ոստիկանությունը Գերագույն ռադայի շենքի մոտ տեղի ունեցած բախումներից հետո ընդամենը մեկ ժամում կարողացավ գրավել Գրուշևսկու փողոցում և Եվրոպեյսկայա հրապարակում կառուցված այն բոլոր բարիկադները, որոնք ավելի քան մեկ ամիս անառիկ էին համարվում:
Գեւորգ Ստամբոլցյան
Նյութի մանրամասները կարդացեք «Ազատություն» ռադիոկայանի կայքում
