Ադրբեջանական գերությունից վերադարձած Մամիկոն Խոջոյանը բուժում է ստանում Իջեւանի բժշկական կենտրոնում: Հիվանդասենյակում նրան խնամում են հարազատները` աղջիկը, հարսը եւ թոռնուհին: Ոստիկանները հսկում են այդ հիվանդասենյակը:
Բժշկական կենտրոնից տեղեկացանք, որ Մամիկոնի ծղունկոսկրը եւ բազկոսկրը կոտրված են, ականջների ծայրերը ջարդված, կողոսկրերը վնասված են, ադրբեջանցիները նրան օտար նյութեր են սրսկել, դրանք հավանաբար թունավոր նյութեր են: Նրան նաեւ հոգեմետ դեղեր են ներարկել, եւ Մամիկոնը գտնվում է թմրած վիճակում:
Ադրբեջանցիները հրազենային զենքով կրակել են նրա թեւի վրա, հետագայում հետքերը թաքցնելու համար նրա թեւը վիրահատել , սակայն դա կատարել են բավական անորակ ձեւով, ոսկորի մի կտորը հեռացրել են, որի հետեւանքով բազկոսկրը կարճացել է, մկանային հյուսվածք է մտել ոսկորի մեջ, հարկ կա հիմա նորից վիրահատելու:
Ադրբեջանցիները նրա թեւի մեջ բժշկական ապարատ են մտցրել, սակայն հետո հանել են 1000-1500 դոլարանոց սարքը:
Կարդացեք նաև
Մամիկոնի աղջիկը` Արծվաբերդ գյուղի բնակչուհի Հեղինե Վարդազարյանն ասաց, որ Ադրբեջանից վերադառնալուց հետո հայրը միայն իրեն է ճանաչում, Մամիկոնը չի կարողանում քայլել, Ադրբեջանում Մամիկոնին ծեծել են, մարմինը վառել, սրսկել, գլխի մասում վերք կա, նա վախեցած է:
Մամիկոնն աղջկան պատմել է , որ Ադրբեջանում իրեն պառկացրել են բետոնի վրա, բետոնի վրա աղ փռել: Հեղինեն ասաց. «Որ նայում եմ`իմ հոր վիճակը վիճակ չէ»:
Մամիկոն Խոջոյանի հարազատները իրենց հոր նկատմամբ հոգատար վերաբերմունքի համար շնորհակալություն են հայտնում Կարմիր Խաչին եւ Իջեւանի բժշկական կենտրոնի բուժաշխատողներին:
Ոսկան ՍԱՐԳՍՅԱՆ
