ԱՄՆ-ի կոնգրեսական Ադամ Շիֆի գլխավորությամբ Կապիտոլյան բլուրում անցկացվել է կոնգրեսականների մամուլի ասուլիս, որի մասնակիցները դատապարտել են Սիրիայում հայկական պատմական Քեսաբ քաղաքի բնակիչների վտարումը:
Կապիտոլյան բլուրում նախօրեին անցկացված մամուլի ասուլիսի ընթացքում, ըստ ԱՄՆ-ում լույս տեսնող հայկական «Ասպարեզ» պարբերականի, կոնգրեսական Շիֆի հետ միասին մասնակցություն են ունեցել ԱՄՆ-ի Կոնգրեսի հայկական հարցերով հանձնախմբի համանախագահ Ֆրենք Փալոունը, կոնգրեսականներ Ջուդի Չուն, Ջիմ Կոստան, Աննա Էշուն և Բրեդ Շերմանը:
«Սիրիայում պատերազմի սկզբի ժամանակից ես մշտապես մտահոգություն եմ արտահայտել Սիրիայի ծագումով հայ և քրիստոնյա այլ բնակչությանը սպառնացող վտանգների կապակցությամբ», – ասել է կոնգրեսական Շիֆը: – «Այս մասին ես անմիջապես խոսել եմ նախագահ Բարաք Օբամայի հետ, և անցյալ շաբաթ այս խնդրի շուրջ հարցեր էի ներկայացրել ՄԱԿ-ում ԱՄՆ-ի դեսպանին, հորդորել եմ նաև Կոնգրեսի արտաքին հատկացումների հանձնաժողովին հատկացնել ժամանակ, ուշադրություն և ռեսուրսներ՝ Սիրիայի քրիստոնյա համայնքին օժանդակություն տրամադրելու համար»:
«Քեսաբի բնակիչների մեծ մասը 1915 թվականին իրականացրած Հայոց ցեղասպանության զոհերի ժառանգներ են: Ցեղասպանության սկզբից գրեթե հարյուր տարի անց նրանց այս կերպ թիրախավորումը հատկապես մեծ ցավ է պատճառում», – ասել է կոնգրեսական Շիֆը:
Կարդացեք նաև
Արմեն Հովհաննիսյան
Նյութի մանրամասները կարդացեք «Ամերիկայի Ձայն»-ի կայքում
