Այսօր Երեւանում ներկայացվեց «Սարքավորումների տրամադրում ՀՀ եւ Վրաստանի սահմանին գտնվող «Բագրատաշեն» եւ «Սադախլո» պետական սահմանի անցման կետերին եւ դրանց կարողությունների գրանցում» ծրագիրը, որն իրականացվում է ՄԱԿ-ի Զարգացման ծրագրերի եւ ԵՄ կողմից:
Ծրագրի նպատակն է հայ-վրացական պետական սահմանի «Բագրատաշեն» եւ «Սադախլո» անցման կետերում ներդնել սահմանների համալիր կառավարման եվրոպական չափանիշներ, որոնք կխթանեն միջազգային առեւտուրը եւ տարանցիկ փոխադրումները եւ կդյուրացնեն մարդկանց միջսահմանային շարժը: Ծրագրի ընդհանուր բյուջեն կազմում է 4.3 մլն եվրո:
ՀՀ-ում ՄԱԿ-ի մշտական համակարգող, ՄԱԶԾ մշտական ներկայացուցիչ Բրեդլի Բուզետտոն իր ելույթում նշեց, որ ծրագիրը նպատակ ունի խթանել Հայաստանի եւ Վրաստանի միջեւ երեք հիմնական անցակետերի արդիականացմանը: Ծրագիրը հնարավորություն կտա դյուրացնել առեւտուրը, տարանցիկ փոխադրումները, մարդկանց հեշտ տեղափոխումը, կամրապնդվի սահմանի անվտանգությունը: «Այս ամենի համար անհրաժեշտ է հստակ իրավական դաշտ , ներգերատեսչական եւ միջգերատեսչական համագործակցության բարձր մակարդակ եւ սահմանի կառավարման ոլորտի մարմիններում թափանցիկություն»:
Ծրագրի ղեկավար Նիկոլոզ Սամխարաձեն լրագրողների հետ զրույցում հայտնեց, որ այս ծրագիրը սահմանների համալիր կառավարման արդեն երրորդ է ծրագիրն է: «Առաջին երկու ծրագրերը բարեհաջող ընթացք ունեցան, այդ պատճառով ուրախ ենք հիմա սկսել երրորդը, այս անգամ Սադախլո-Բագրատաշեն սահմանին»:
Կարդացեք նաև
Պրն Սամխարաձեն նշեց, որ քանի որ վրացական կողմում ենթակառուցվածքներն արդեն իսկ թարմացված են, ապա այնտեղ կիրականացվի միայն տեխնիկական միջոցների տրամադրում: Իսկ հայկական կողմում ենթակառուցվածքի բարելավումներ կիրականացվեն, որի արդյունքում կտեղադրվեն բեռնափոխադրող մեքենաների ռենտգեն սկանավորող սարքեր:
ՍՀԿ ծրագրերի պատասխանատու Գրիգորի Մալիցյանը լրագրողներին ասաց, որ մեկ պատուհան անցակարգային համակարգի նպատակը հենց տնտեսվարող սուբյեկտների կանխավ տեղեկացված լինելն է.«
Տնտեսվարող սուբյեկտի համար պետք է ստեղծել կանխատեսելի միջավայր, պետք է ներդնել այնպիսի համակարգ, որ տնտեսավարող սուբյեկտը ստանա կանխավ տեղեկատվություն ներմուծված ապրանքների մաքսազերծման գնի վերաբերյալ»:
Պրն Մալիցյանը հայտնեց, որ ծրագրի բյուջեի 4.3 մլն եվրո գումարի մի մասը նախատեսված է սարքավորումների ձեռք բերման համար, իսկ մյուս մասը նախատեսված է կարողությունների զարգացման, դասընթացների, աշխատաժողովների, ուսումնական այցերի համար: Հայտնեց նաեւ, որ ծրագիրը կիրականացվի 18 ամիսների ընթացքում եւ մոտավորապես երկու տարի հետո այն ամբողջությամբ պատրաստ կլինի:
Պրն Մալիցյանը փաստեր ներկայացրեց, որ Բագրատաշեն անցակետում մաքսային գործընթացներ չեն իրականացվում, մինչդեռ Սադախլո անցակետում իրականացվում են: Ըստ նրա՝ ծրագրի իրագործումից հետո հնարավոր կլինի մաքսային ձեւակերպումների իրականացումը դյուրացնել նաեւ Հայաստանում:
ՀՀ ԿԱ պետական եկամուտների կոմիտեի նախագահ Գագիկ Խաչատրյանը բացման խոսքով հանդես եկավ եւ նշեց, որ ծրագրով Հայաստանի համար նախատեսված է իրականացնել էլեկտրական ցանցերի, գազատարի , օպտիկական մանրաթելային ցանցի կառուցապատման աշխատանքներ: Ծրագրի միջոցով նաեւ հնարավորություն կլինի ներդնել մեկ պատուհան համակարգը:
Էլյա ՀՈՎՀԱՆՆԻՍՅԱՆ
