Ազգային ժողովը քիչ առաջ 96 կողմ, 15 դեմ եւ 4 ձեռնպահ ձայների հարաբերակցությամբ թույլատրեց կառավարությանը առաջիկա հինգ տարիների ընթացքում Սեւանա լճից ոռոգման նպատակով 70 մլն խմ ավելի ջուր բաց թողել:
Հիշեցնենք, որ համաձայն «Սեւանա լճի էկոհամակարգի վերականգնման, պահպանման, վերարտադրման եւ oգտագործման միջոցառումների տարեկան ու համալիր ծրագրերը հաuտատելու մաuին» ՀՀ օրենքի, որը ընդունվել է 2001 թվականին, թույլատրվում է տարեկան Սեւանից վերցնել 170 մլն խմ ջուր՝ ոռոգման նպատակով: Այսօր մեր երկիրը կանգնած է փաստի առաջ՝ անխնա օգտագործվել են Արարատյան դաշտավայրի ստորգետնյա արտեզյան ջրերը, չունենք բավարար չափով ջրամբարներ եւ ոռոգման համար ջրի սուր դեֆիցիտ է առաջացել:
Երեկ այս հարցի քննարկումն անցավ լարված մթնոլորտում՝ ընդդիմությունը իշխանություններին մեղադրեց երկրի հարստությունը՝ ջուրը, մսխելու, կոռուպցիայի, ձկնաբուծությանը՝ որոշ իշխանավորների բիզնեսին, արտոնություններ տալու պատճառով ստորգետնյա ջրերը ցամաքեցնելու մեջ:
Իշխանության բերած միակ փաստարկն էլ հետեւյալն էր՝ անկախ պատճառներից, կանգնել ենք փաստի առաջ՝ ջուր չկա, եւ եթե Սեւանից ավելի շատ ջուր չվերցնենք, գյուղատնտեսությունը լուրջ կրախի առաջ կկանգնի:
Կարդացեք նաև
Այսօր քվեարկությունից առաջ «Բարգավաճ Հայաստան» կուսակցության քարտուղար Նաիրա Զոհրաբյանը տեղեկացրեց, որ իրենց խմբակցությունը տասնյակ գյուղատնտեսական ընկերություններ եւ գյուղացիներ դիմել են իրենց՝ պարզաբանելով, որ ոռոգման ջրի խնդիր ունեն, ուստի ԲՀԿ-ն որոշել է կողմ քվեարկել՝ գյուղացիներին վատ դրության մեջ չդնելու համար, սակայն պահանջում է Սեւանի հարցով լրջագույն վերահսկողություն:
Մելանյա ԲԱՐՍԵՂՅԱՆ
