Կառավարության աշխատակազմի ղեկավար-նախարար Դավիթ Հարությունյանն իր հայտարարագրած ունեցվածքի մասին հարցին ի պատասխան՝ վստահեցրել էր, որ դա, այսպես ասած, պապական հարստություն է. «Ես չեմ ներկայացնի ձեզ Մոսկվայի կոմունալ բնակարանում իմ սենյակը, որն ինձ բաժին է հասել հորեղբորիցս: Նա կտակել է, եւ այնտեղ մինչեւ հիմա ապրում է հորեղբորս կինը: Դա հին պատմություն է: Ես կարծում եմ, որ ձեզ նաև չի հետաքրքրի իմ տատիկիս կիսավարտ տունը, որը տատիկս ձեռք է բերել 70-ական թվականներին, իսկ ինձ որպես կտակ հասել է մինչև քաղաքականությամբ զբաղվելը:
Արդարադատության նախարար Հովհաննես Մանուկյանը News.am-ին իր ունեցվածքի հետ կապված ասել էր, որ իր պապը բավականաչափ բարեկեցիկ կյանք է վարել:
Aravot.am-ի հետ զրույցում «Ժառանգություն» կուսակցության փոխնախագահ Արմեն Մարտիրոսյանը հակադարձեց բարձրաստիճան պաշտոնյաների՝ պապական հարստության մասին այս պնդումներին. «Պապենական հարստություն Սովետական միությունում չկար: Սովետական միության ընթացքում բոլորը, ըստ էության, մասնավոր սեփականություն չունեին, առավելագույն սեփականությունը կարող էր լինել 3-4 սենյականոց բնակարան եւ մեկ հարկանի կամ երկհարկանի որեւէ ամառանոց: Դրանից ավելին ունենալ ԽՍՀՄ-ում, ուղղակի չէր թույլատրվում: Ապրելակերպը ԽՍՀՄ-ի փլուզվելու վերջում բոլորովին չի ենթադրել, որ իրենք պապենական ունեն: Պապենական հարստության, իրենց ունեցվածքի մեծացումը ուղիղ համեմատական է եղել իրենց գրաված պաշտոնին՝ որքան մեծացել է պաշտոնը, այնքան հարստության թռիչքաձեւ աճ է գրանցվել»:
Հռիփսիմե ՋԵԲԵՋՅԱՆ
Լուսանկարը Գագիկ Շամշյանի` shamshyan.com
Խաչագողերի հարստությունների հիշատակարանը: