«Հայաստանի վարչապետի հետ քննարկել ենք նաեւ Վերին Լարսում տեղի ունեցած սողանքի խնդիրը եւ Վրացական կողմը պատրաստակամություն է հայտնել երկու-երեք օրում գազի մատակարարումը վերականգնել»,-այսօր կառավարությունում տեղի ունեցած Վրաստանի եւ Հայաստանի երկու վարչապետների մինի ասուլիսի ժամանակ ասաց Վրաստանի վարչապետ Իրակլի Ղարիբաշվիլին:
ՀՀ վարչապետ Հովիկ Աբրահամյանն ասաց, որ հանդիպման ժամանակ քննարկել են երկուստեք հետաքրքրություն ներկայացնող հարցերի լայն շրջանակ, առեւտրատնտեսական, ենթակառուցվածքների զարգացման, կրթական, մշակութային ժառանգության պահպանման, տրասնպորտային կապի բարելավման եւ այլ հարցեր:
Ըստ Վրաստանի վարչապետի, Բագրատաշեն-Սադախլո անցակետերում նոր կամուրջ կկառուցվի, որը կողմերն անվանել են «Բարեկամության կամուրջ»:
Իրակլի Ղարիբաշվիլին նաեւ նշեց, որ ոչ միայն բարձր մակարդակով պետք է համագործակցեն, այլեւ, ըստ նրա, գերատեսչությունների միջեւ էլ պետք է կապերն ընդլայնվել:
Կարդացեք նաև
Վրաստանի վարչապետը նաեւ ասաց, որ այս տարվա վեց ամիսների կտրվածքով երկու երկրների միջեւ առեւտրաշրջանառությունը 42 տոկոսով ավելացել է: Երկու երկրների վարչապետները նաեւ հայտնեցին, որ անդրադարձ է կատարվել նաեւ տարածաշրջանային անվտանգության հարցերին:
Ասուլիսի ընթացքում լրագրողները հարց տալու հնարավորություն չունեցան: Կողմերը չխոսեցին վիզային ռեժիմի եւ ազատ առեւտրի համաձայնագրին առնչվող հարցերից, մինչդեռ նախապես հայտարարվել էր, որ այդ հարցերը նույնպես քննարկվելու էին:
Լուսինե ԲՈՒԴԱՂՅԱՆ
