Հրազդանի պատկերասրահը գտնվում է Խորհրդային Միության նախկին գործադիր կառույցներից մեկի տեղում: Այստեղ անցյալից շատ բան է պահպանվել՝ գունազարդ ապակիները, հնաոճ ինտերիերը, նույնիսկ տարիների խոնավությունը:
Պատկերասրահի առաջնային խնդիրներից մեկը տանիքն է: «Հենց անձրևները սկսվում են, մի ոտքս տանիքին է»,- ասաց վարիչ Արամ Ղազարյանը: Վեց սրահներից գործում են միայն երեքը. մյուսները կապիտալ վերանորոգման կարիք ունեն:
Պարոն Ղազարյանի խոսքով՝ անցյալ տարի իր ուժերով վերանորոգել է սրահներից մեկի հատակն ու տանիքը, իսկ այժմ փոխում է սանհանգույցի ջրագիծը: Բանախոսը տեղեկացրեց, որ մեկ շաբաթ առաջ հանրապետական մասշտաբով անցկացվել է ցուցահանդես-մրցույթ՝ նվիրված կինոռեժիսոր Սերգեյ Փարաջանովին: Կոտայքի մարզից ընտրվել են 7 լավագույն աշխատանքներ, որոնք սեպտեմբերի վերջին կներկայացվեն Ազգային Ժողովի նախաձեռնած եզրափակիչ մրցույթին: Ի պատասխան այն հարցին, թե արդյո՞ք տարիների ընթացքում ավելացել են պատկերասրահ այցելությունները, մեր զրուցակիցը ցավով նշեց, որ տոմսի չնչին գինն անգամ խնդիր է բնակիչների համար: Նրա կարծիքով՝ երեխան ուտելիքի համար նախատեսված 200 դրամը չի ծախսի պատկերասրահի տոմսի վրա: «Ես որոշեցի խորամանկություն անել` թույլ տալով, որ մեկ տոմսով 5 հոգի գան պատկերասրահ: Միայն թե գան…»,- եզրափակեց նա:
Անի Անտոնյան
