Երևանում այսօր մեկնարկեց Միջազգային կոմունիկացիոն երկօրյա բիենալեն, որի նպատակներն են աշխարհի տարբեր անկյունների գովազդային ընկերությունների միջև կապերի զարգացումն ու ամրապնդումը, եվրոպական և ասիական գովազդային գործակալությունների միջև փորձի և գիտելիքների փոխանակումը, ինչպես նաև ուսանողների և գովազդային ոլորտի աշխատողների մասնագիտական աճը:
Բիենալեին ներկայացված մոտ 320 աշխատանքների 10%-ը Հայաստանից են:
«Սա բավականին մեծ թիվ է,- այսօր լրագրողների հետ զրույցում նշեց Երևանի միջազգային կոմունիկացիոն բիենալեի նախագահ Արմեն Մարտիրոսյանը,- համեմատաբար ավելի շատ աշխատանքներ կան Ռուսաստանից, Ղազախստանից, Ուկրաինայից, կան աշխատանքներ նաև Գերմանիայից, Ֆրանսիայից, Լեհաստանից, Լատվիայից, Էստոնիայից, Իրանից, Սինգապուրից և այլ երկրներից: Ընդհանուր առմամբ, բիենալեին մասնակցում են մոտ 17 երկրների ներկայացուցիչներ»:
Պարոն Մարտիրոսյանի տեղեկացմամբ՝ բիենալեին ներկայացված աշխատանքները կմրցեն ինը անվանակարգերում, որոնք են՝ հեռուստատեսային և վիդեո գովազդ, տպագիր և արտաքին գովազդ, թվային և նոր մեդիա, ռադիո գովազդ, գրաֆիկ դիզայն, մարքեթինգային արշավներ, ՓիԱռ արշավներ, գիրք, սոցիալական գովազդ:
Յուրաքանչյուր անվանակարգում կտրվի մրցանակ լավագույն աշխատանքի համար, կշնորհվի նաև բիենալեի «Գրան պրի»: Ենթաանվանակարգերում մրցող աշխատանքները մրցատյանի որոշմամբ կարժանան առաջին, երկրորդ և երրորդ մրցանակների:
«Մեզ թեժ պայքար է սպասվում,- համոզված է միջազգային կոմունիկացիոն բիենալեի նախագահը,- քանի որ բիենալեին ներկայացված աշխատանքների մեծ մասն արդեն հաղթել է այլ փառատոների ժամանակ: Ամենակարևորն այն է, որ հայաստանցի ստեղծագործողը պայքարի, մրցակցի աշխարհի ստեղծագործողների հետ, իր աշխատանքների թերությունները նկատի և առավելությունները զգա»:
Հավելենք, որ Միջազգային կոմունիկացիոն բիենալեն կտևի մինչև հոկտեմբերի 18-ը: Այդ ընթացքում նաև վարպետաց դասեր կանցկացվեն Հայ-ռուսական (Սլավոնական) համալսարանում:
Սիրանուշ ՀԱՅՐԱՊԵՏՅԱՆ
Կարդացեք նաև
