Կառավարման փորձագետ Հարություն Մեսրոբյանը երեքշաբթի «Պոստ սկրիպտում» մամլո ակումբում լրագրողների հետ հանդիպման ընթացքում նշեց, որ ինքը դեմ է թե՛ Եվրասիական տնտեսական միությանը, թե՛ Եվրամիությանը, քանի որ Հայաստանն երեք խնդիր ունի. «Առաջինը՝ ի՞նչ է լինելու Արցախի հետ, անկախ դրանից դա ԵՏՄ-ն է, թե ԵՄ-ն է, որտե՞ղ է իրավաբանորեն գտնվելու Արցախը, դա միայն Հայաստանի խնդիրն է:
Երկրորդ խնդիրն այն է, որ ե՛ւ ԵՏՄ-ի հետ, ե՛ւ ԵՄ-ի հետ մենք չունենք ընդհանուր սահման: Եթե համաձայնագրեր են կնքվում, որտեղ կա ուժեղ տնտեսական մաս, իսկ տնտեսական մասն իր մեջ ենթադրում է առեւտրային մաս, եւ չկա ընդհանուր սահման, բնականաբար, առաջանում է տրանզիտ երկրների խնդիրը: Եվ երրորդ խնդիրը, որը ցանկացած երկիր պետք է հաշվի առնի, ինքնիշխանության նվազումն է»:
Հարություն Մեսրոբյանը բերեց Շվեյցարիայի օրինակը, որը գտնվելով Եվրոպայում Եվրամիության անդամ չէ: Նրա խոսքերով՝ մինչդեռ Հունաստանը Եվրամիության առջեւ հարց է դնում կա՛մ վերանայել իրենց պարտքերը եւ մեծ մասը «ջրել», կա՛մ իրենք մտածելու են միությունից դուրս գալու մասին, Շվեյցարիայում շվեյցարական ֆրանկով դրված ավանդներն ունեն բացասական տոկոս. «Հերի՛ք է, սրա-նրա փեշի տակ մտնենք, մտնում ենք, հետո սկսում ենք «քլնգել» Ռուսաստանին, Արեւմուտքին: Ես պնդում եմ, որ մեր խնդիրների 99.999 տոկոսի մեջ մենք ենք մեղավոր ոտքից գլուխ, 0.001 տոկոսը չգիտեմ՝ ով է մեղավոր, անկեղծ եմ ասում»:
Ամի ՉԻՉԱԿՅԱՆ
