ԲՀԿ-ականների պատասխանը ՀՅԴ-ին՝
հայերենի բոլոր բառերն ինչ-որ ժամանակ ինչ-որ մեկն օգտագործել է
Օրերս ԱԺ-ում ՀՅԴ խմբակցության ղեկավար Արմեն Ռուստամյանը ոչ իշխանականների խորհրդաժողովում Գագիկ Ծառուկյանի ելույթի հետ կապված հայտարարեց, որ այն, այսպես ասած, «ծաղկաքաղ» է արված ՀՅԴ-ականների ելույթներից: Ըստ նրա՝ «Այն, ինչ հրապարակավ հիմա ասում են, այդ ամենը վաղուց ՀՅԴ-ն հրապարակել է: Կարող եմ ելույթի հետ կապված բառ առ բառ ասել: Օրինակ՝ 2010-ի Գերագույն ժողովի արդյունքները ամփոփելիս հունիսին ասել եմ՝ ՀՅԴ-ն ցանկանում է ձեւավորել նոր որակի իշխանություն: Հիմա մենք լսում ենք նոր որակի իշխանություն ձեւակերպումը: Ասում են՝ արդյունավետ կառավարման համակարգ. վաղուց ենք ասել: Նույն բառերն եմ ես անձամբ ասել՝ կապված կադրային քաղաքականության հետ, որ Սփյուռքի մեր բանիմաց կադրերը պետք է ընդգրկվեն մեր պետականաշինության գործի մեջ: Մենք էլ ենք ասում՝ իշխանափոխությունը չպետք է լինի մարդափոխություն»:
«Առավոտի» հետ զրույցում մեր հարցին՝ լավ, Գագիկ Ծառուկյանը ոչ մի նոր բան չի՞ ասել խորհրդաժողովին, Արմեն Ռուստամյանը պատասխանեց. «Այդ իմաստով՝ ոչ: Մենք կողմ ենք այդ ամեն ինչին: Գնահատվում է ստեղծված իրավիճակը, գնահատվում են պատճառները, որ քաղաքական մենիշխանություն է առաջացել: Իսկ մենիշխանության ամենախորքային ձեւակերպումը մենք ենք տվել՝ պետություն եւ իշխող կուսակցություն նույնացում: Բայց ամբողջ խնդիրը լուծումների մեջ է, թե ով ինչպես է պատկերացնում լուծումները»:
Մեր հարցին՝ Ձեզ չի՞ գոհացնում այն պատասխանը, որ շուտով կոնսոլիդացնելու են հասարակությանը, հանրահավաքներ անեն եւ հանրահավաքների միջոցով պարտադրեն իշխանությունը հանձնել, Արմեն Ռուստամյանը պատասխանեց. «Հանրահավաքները միջոց են, բայց նպատակ չեն: Հանրահավաքները միջոց են՝ նպատակին հասնելու: Եթե նպատակը չի ձեւակերպվում՝ այդ պայքարի հարատեւությունը, դրա մասին ես խոսել եմ, երբ Րաֆֆի Հովհաննիսյանի հանրահավաքներին էինք մասնակցում, ասում էր՝ պետք է կազմակերպվի շարժումը եւ այլն: Հանեք եւ տեսեք, որ նորություն որեւէ տեղ չկա: Նորից գալիս են այն մտքին, որի մասին խոսվել է: Օրինակ՝ մենք ասացինք, որ շտաբների ձեւավորումը վատ չի, որովհետեւ պետք է շարժումը կազմակերպվի, եւ շարժմանը զուգահեռ պետք է հանրահավաքներ ընթանան, որ թափ տան կազմակերպման պրոցեսին: Այս ամենի մասին մենք վաղուց խոսել ենք, բայց ի՞նչ նպատակի համար, ո՞ւր գնան, որ ի՞նչ անեն: Մենակ այն լինի, որ այս իշխանությունը փոխե՞ն, մենակ մարդկա՞նց փոխեն, մարդափոխությո՞ւն անեն, որի մասին իրենք էլ են խոսում, որ կարծես թե վատ է դա: Վատ է, հարգելիներս, ուրեմն մնում է այն, ինչ ասել է ՀՅԴ-ն՝ ամբողջական իշխանափոխություն: Չնայած այդ մեր տերմինն էլ են հիմա օգտագործում որպես նորարարություն՝ իրենց կողմից»:
Կարդացեք նաև
Մեզ հետ զրույցում ԲՀԿ խմբակցության պատգամավոր Միքայել Մելքումյանը վստահեցրեց, որ Գագիկ Ծառուկյանը ՀՅԴ-ից չի սովորել իր ելույթի տեքստը. «Այն, ինչ Գագիկ Ծառուկյանն իր ելույթում ասել է, եթե դուք հետեւեք նրա նախորդ ելույթներին, դեռ 1.5 տարի առաջ ԲՀԿ համագումարում էր ինքը ասել, որ պատրաստ են Սփյուռքից մասնագետներ հրավիրել: Ապրիլի 12-ին արդեն արեց իր ասածը, եւ տնտեսական համաժողով կազմակերպեցինք, որին նաեւ ՀՅԴ-ի ներկայացուցիչներն էին մասնակցում: Հայ-չինական մեծ համաժողով եղավ: Այն թեզերը, ինչ Գագիկ Ծառուկյանն իր ելույթում հնչեցրել է, մենք բոլորս էլ տարբեր ռակուրսներով անընդհատ ասել ենք՝ նոր որակի իշխանություն, համախմբում եւ այլն: Միանշանակ կարելի է մերժել դա, թե ծաղկաքաղ է արված ՀՅԴ-ականների ելույթներից: Ես նույնիսկ զարմացած եմ, թե այդ ի՞նչ մտքեր են ընդհանրապես»:
«Երբ նա դա ասաց, չծիծաղեցի՞ք»,- Արմեն Ռուստամյանի խոսքերին այսպես արձագանքեց ԲՀԿ պատգամավոր Ստեփան Մարգարյանն ու սկսեց տեւական ժամանակ ծիծաղել:- Ես նման բանին հումորով կվերաբերվեի ուղղակի»:
Ըստ Ստեփան Մարգարյանի՝ «Մենք հիմա մրցում ենք, թե ո՞վ է առաջինն ասել: Ես չգիտեմ՝ ճիշտն ասած, վստահ եմ, որ շատ վաղուց է Հայաստանում եղել Սփյուռքից մասնագետ կանչելու գաղափարը: Առաջին հանրապետության ժամանակ էլ դրսից մարդիկ են եկել: Հիմա ասենք՝ ո՞վ առաջինն ասեց: Խոսքը նրա մասին է, թե ինչքանով ենք հետեւում դրան: 90-ականներին էլ Հայաստանում կային աշխատող դրսից եկած մարդիկ: Ինչո՞ւ 2010-ն է հիշում: 90-ականներին մի քանի նախարար է աշխատել Հայաստանում Սփյուռքից եկած: Ինչո՞ւ ընդամենը 2000 թիվը գնանք: Րաֆֆի Հովհաննիսյանը սփյուռքից եկավ դարձավ նախարար, չէ՞: Այսինքն՝ գաղափարը նոր չէ, ոչ էլ 90-ականներին է եղել, շատ ավելի վաղ է: Դա շատ տրամաբանական գաղափար է, որովհետեւ հայ ժողովրդի մեջ միշտ բարձր է եղել մեկ ազգ հասկացությունը: Մենք միշտ հայրենիք ու ազգ ենք սիրել: Դա դրանից է բխում»:
Ինչ վերաբերում է «նոր որակի իշխանություն» արտահայտությանը, Ստեփան Մարգարյանի խոսքերով՝ «Ծիծաղելի է ասել, թե ով է ասել նոր որակի իշխանություն: Հայերենի բոլոր բառերը ինչ-որ ժամանակ ինչ-որ մեկն օգտագործել է: Հիմա պիտի թույլ չտա՞նք որեւէ մեկին խոսել, ասենք՝ մենք դա ասել ենք ինչ-որ տեղ, հա՞: Հումորով վերաբերվեք»:
ՀՌԻՓՍԻՄԵ ՋԵԲԵՋՅԱՆ
«Առավոտ» օրաթերթ
10.02.2015
Եկեք հումորով վերաբերվենք նաև այն փաստին որ Ծառուկյանից Հայաստանի նախագահացու են պատրաստում: Անձամբ ես չեմ կարողանում առանց երկարատև ծիծսղի կարդալ կամ լսել դրա մասին: Բայց հետո սկսում է խիղճս կտրատվել մեր խեղճ ժողովրդի ու երկրի համար: Նախագահը արտաքին սպառման համար է: Բացի դուխով ուտել խմելուց պետք է դրսում Հայաստան ներկայացնի, հազար ու մի փորձանքներով ենք շրջապատված – պետք է դրանց միջով գրագետ խուսանավել, պետք է համաշխարհային պատմություն քիչ թե շատ իմանալ (իրականում շատ լավ իմանալ կամ գոնե Հայաստանի և մոտակա հարևվանների), իրավունքի հիմունքներ, միջազգային իրավունք իմանալ, հասարկագիտություն, …. չէ տեռորիստական ակտ է կատարվում մի ամբողջ ընտանիքի նկատմամբ կամ ծեծում ջարդում են մարդկանց որևէ պաշտոնյա հպարտորեն հայտարարում է` ես ասել եմ այս դեպքը անպայման բացահայտեն: Ինքն էլ այդ շարքից է: Ես ասեցի, ես արեցի…. Տո այ անգրագետներ դուք պետք է չասեք, դա ամրագրված է մեր երկրի օրենքով: Դուք բարի եղեք կիրառեք օրենքը: ՈՒմ ինչ ասենք: Գագոն դարձել է համազգային իդեալ:Ձյուն գա գլխիդ իմ հայ ժողովուրդ:
Հ.Գ. հրապարակեք էլի Ծառուկյանի կենսագրությունը ճշտությամբ – ինչ դատվածություն և ինչի համար և այլ արժանահիշատակ դեպքեր….