«Ես նոր զրուցեցի ԱԺ նախագահի հետ: ԱԺ նախագահը հանձնարարական է իջեցրել, որպեսզի ուսումնասիրվեն Գագիկ Ծառուկյանի բացակայությունները եւ նրանց հիմքերը: Ուսումնասիրություններից հետո ԱԺ նախագահը կկայացնի իր որոշումը, որից հետո մենք արդեն ըստ դրա կշարժվենք»,- քիչ առաջ Aravot.am-ի հետ զրույցում ասաց ՀՀԿ խմբակցության ղեկավար Վահրամ Բաղդասարյանը՝ պատասխանելով մեր հարցին՝ Սերժ Սարգսյանն ասաց, որ այսօրվանից պետք է զբաղվեք Գագիկ Ծառուկյանին մանդատից զրկելու հարցով, ի՞նչ քայլեր են արվել այս պահի դրությամբ:
Վահրամ Բաղդասարյանը, մեր հարցին՝ այսինքն, հետքայլի հնարավորություն կա՞, երբ արդեն Գալուստ Սահակյանը հարգելի է համարել Գագիկ Ծառուկյանի բացակայությունները՝ պատասխանեց. «Կանոնակարգը բնականաբար չի խախտվելու, ամեն ինչ լինելու է կանոնակարգով: Յուրաքանչյուր նստաշրջանի ավարտից հետո անդրադարձ կատարվում է, անցած նստաշրջանի արդյունքները դեռ չեն ամփոփվել, դեռ ամփոփվում են: Կանոնակարգը նախ պետք ուսումնասիրեն իրավաբանները, կանոնակարգի որեւէ խախտում չի լինելու»:
Մենք ճշտեցինք՝ այսինքն, հնարավորություն կա՞ այդ հիմքի վրա զրկելու Գագիկ Ծառուկյանին մանդատից՝ Վահրամ Բաղդասարյանը պատասխանեց. «Եթե չլինի նման հնարավորություն,, բնականաբար, նման հարց չի բարձրացվի»:
Կարդացեք նաև
ԱԺ պետաիրավական հարցերի հանձնաժողովի նախագահ Հովհաննես Սահակյանն էլ մեզ հետ զրույցում ասաց, որ Գագիկ Ծառուկյանի բացակայությունների խնդիրը ԱԺ նախագահի լիազորությունների տիրույթում է. «Երբ նստաշրջանից հետո աշխատակազմը ներկայացնում է կեսից ավելի նիստերին բացակայած պատգամավորների խնդիրը, այնտեղ կան մի քանի բացառություններ, երբ ավտոմատ համարվում է հարգելի: Օրինակ, երբ խմբակցությունը որոշում է, որ չի մասնակցելու կոնկրետ հարցի քվեարկությանը՝ որպես քաղաքական ժեստ: Բայց կարող է տեղեկանք բերի, բժշկի թուղթ, տեղեկացնի ԱԺ նախագահին, ԱԺ նախագահը որոշում է՝ հարգելի է, թե ոչ: Եթե հարգելի չի լինում, քառօրյա նիստում փակ գաղտնի քվեարկության արդյունքում որոշում է կայացվում մանդատից զրկել, թե չզրկել»:
Մեր հարցին՝ հիմա, երբ Գալուստ Սահակյանն արդեն Գագիկ Ծառուկյանի բացակայությունները հարգելի է համարել, իրավական առումով հետդարձի ճանապարհ կա՞՝ Հովհաննես Սահակյանը պատասխանեց. «Իրավական առումով, կարծում եմ, կա: Դա բացառապես ԱԺ նախագահի լիազորությունների տիրույթում է: Ինքը պետք է որոշի՝ ճի՞շտ է վարվել, թե՞ սխալ է վարվել»:
Հռիփսիմե ՋԵԲԵՋՅԱՆ
Էս ՀՀԿ ական «կերակրատա…» օգտվողներին հարկավոր ա վախ բռնողի մոտ տանել…էս ինչ վայնասուն են բարձրացրել…խեղճ «մարդիկ» … իրանց « Այբ ու Բեն» իմացող գրագետ «քավոր պապայի» ձեռքը կրակն են ընկել…