Այսօր կառավարության շենքի մոտ «Նաիրիտ» գործարանի աշխատակիցները կրկին բողոքի ակցիա էին անում: Նրանք «Մի բռնաբարեք ՀՀ օրենքները», «Պահանջում ենք 5 000 000 000 դրամ պարտքի վճարում», «Տվեք մեր փողերը, եւ վերջ» այսպիսի գրառումներով պաստառները ձեռքներին կառավարության մոտ բացականչում էին` «Պարտքի մարում, պարտքի մարում»:
Բողոքի ցույցի մասնակիցները հիմնականում աշխատանքից ազատվածներն էին: Ցուցարարներից մեկն Aravot.am-ի հետ զրույցում ասաց, որ մարդկանց այն աստիճանի են հասցրել, որ այլեւս մտահոգ էլ չեն` կաշխատի՞ գործարանը, չի աշխատի. «Մեր փողերը տան, գնանք տուն»:
Նաիրիտցիներից մեկն էլ ասաց, գործարանի չաշխատելու ու բողոքի ակցիայի համար մեղավորը կառավարությունն է, միշտ հույս են տվել, ու վերջում ստել. «Էն որ ասում են միջինը 200 հազար աշխատավարձ են տվել մարդկանց, էդպես չէ, քիչ են տվել: Վերեւները միլիոններ են ստանում, դրանց էլ գումարում են սաղի հետ, հանում միջին աշխատավարձ, ու ասում, թե 200-250 հազար աշխատավարձ են տվել: Սուտ են ասում` 35-40 հազար են տվել»:
Հիշեցնենք, որ կառավարությունը խոստացել է մինչեւ փետրվարի 28-ը մեկ ամսվա աշխատավարձ վճարել, այդ թվում նաեւ աշխատանքից ազատվածներին, սակայն վերջիններս պահանջում են 18 ամսվա աշխատավարձերը միանգամից վճարել:
Կարդացեք նաև
Նելլի ԲԱԲԱՅԱՆ
