«Եկեք իրերն իրենց անուններով կոչենք՝ Հայոց ցեղասպանությունը ցեղասպանություն էր»,-այսօր Երեւանում ընթացող Եվրանեսթ ԽՎ լիագումար այսպիսի դիտարկում արեց ԵԽ պատգամավոր Յարոմիր Շտետինան:
«Ենթակառուցվածքային համագործակցությունը ԵՄ-ի եւ Արեւելյան Եվրոպայի գործընկեր երկրների միջեւ համատեղ նախագծեր ճանապարհների, երկաթուղու, օդային տրանսպորտի ոլորտներում» զեկույցի քննարկման ժամանակ համազեկուցող Մհեր Շահգելդյանն ասաց, որ այդ զեկույցը կարեւոր նշանակություն ունի գլոբալիզացվող աշխարհում. «Կոմունիկացիաներն այն ոլորտն են, որն առաջնային են զարգացում ապահովելու համար: Մի քանի կետեր կային զեկույցում, որոնք սկզբունքներ են՝ կոմունիկացիաների ազատականացումն է, սահմանափակումների եւ շրջափակումների վերացումը, մարդկանց անվտանգությունը: Ցավոք, արեւելյան գործընկերության երկրներում շատ մարդիկ զոհվում են՝ ճանապարհային պատահարների պատճառով: Եվս մեկ կարեւոր սկզբունք է ազատ երկնքի փիլիսոփայության ամրագրումը նաեւ մեր երկրի համար: Կարեւորում եմ բարեփոխումների իրականացման անհրաժեշտությունը մեր երկրում:
Մհեր Շահգելդյանը կոչ արեց, որ զեկույցում ամրագրված կետերը չմնան թղթի վրա, այլ էական քայլեր ձեռնարկել այդ ուղղությամբ: Դա ողջունվեց պատվիրակների կողմից:
Կարդացեք նաև
ՀՀ ԱԺ պատգամավոր Հրանտ Բագրատյանն էլ ասաց. «Պետք է նկատի ունենալ երկու հանգամանք՝ ժամանակն է, որ Եվրոպայում տնտեսական եւ քաղաքական հարցերը իրար չխառնվեն: Շատ հաճախ քաղաքական բանավեճերը վերջանում են տնտեսական բլոկադայով: Այս ուղղությամբ պետք է աշխատել: Եվրոպան գնալով ավելի շատ հայտնվում է գլոբալ տնտեսության շրջանակներում: Առաջանում է վիճակագրության խնդիր փոքր երկրների համար: Մարդիկ ապրում են մի երկրում, բայց արտադրությամբ կամ աշխատանքով զբաղվում են այլ երկրում: Դա խնդիրներ է առաջացնում»:
ՀՅԴ պատգամավոր Արծվիկ Մինասյանն էլ ասաց. «ԵՄ-ն պետք է բավարար ջանքեր գործադրի այս տարածաշրջանում փակ սահմանների վերացման ուղղությամբ: Թուրքիայի եւ Ադրբեջանի կողմից շուրջ 25 տարի է, կիրառվում է փակ սահմանի խնդիրը Հայաստանի նկատմամբ: Հայաստանը չունենալով դեպի ծով ելք, այսօր միակ սահմանը դեպի Եվրոպա տանող Վրաստանն է դառնում: Կոչ ենք անում ջանքեր գործադրել, ճնշում գործադրել Թուրքիայի վրա՝ առանց նախապայմանների սահմանը բացելու ուղղությամբ: Առեւտրային շրջանառության 35 տոկոսի մասին է խոսքը: Դա պետք է շատանա, եւ Հայաստանն ավելի շատ ինտեգրվի Եվրոպայի հետ»:
Հռիփսիմե ՋԵԲԵՋՅԱՆ
