Արդեն 20 րոպե է՝ «Նաիրիտ» գործարանի նախկին աշխատակիցները, որոնք այսօր առավոտյան կառավարության շենքի առջեւ կրկին բողոքի ակցիա էին անում, վարչապետի մոտ ընդունելության են: Նաիրիտցիներից կազմված 6 հոգանոց պատվիրակությանն այսօր «Նաիրիտի» հարցով վարչապետի մոտ ստեղծված հանձնաժողովը պիտի որեւէ պատասխան տա: Նաիրիտցիների հետ այսպես պայմանավորվել է վարչապետը՝ նախկին հանդիպման ժամանակ, որը կայացել էր ուղիղ 10 օր առաջ:
Այս պահին կառավարության շենքի առաջ հարյուրավոր նաիրիտցիներ սպասում են վարչապետի պատասխանին: Նրանց խոսքերով՝ եթե կառավարության որոշումը նաիրիտցիներին աշխատավարձ վճարելու հարցում դրական չեղավ, ակցիաները չեն դադարեցվելու: «Իրենց ինչ կա՝ տաք տեղում նստած իրենց աշխատավարձը ամեն ամիս ստանում են, էլ չենք ասում միլիոնների եկամուտների մասին: Բայց նաիրիտցին այսօր պարտքով է հաց առնում, լույսի ու գազի գումար վճարում: Շատերիս բնակարաններում այսօր հոսանքն անջատված է: Փոքրիկ երեխային ո՞նց բացատրենք, որ պետք է գույքը վաճառեն ու նոր մեզ վճարեն»,- վրդովված ասում էին «Նաիրիտ» գործարանից ազատված աշխատակիցները:
Կարդացեք նաև
Լուսինե ԲՈՒԴԱՂՅԱՆ
