Սահմանադրական փոփոխությունների դեմ հանդես եկող «Չեք անցկացնի» քաղաքացիական նախաձեռնությունը փորձում է հանդիպումներ կազմակերպել քաղաքական տարբեր ուժերի հետ։
Նպատակը՝ հստակեցնել նրանց դիրքորոշումը փոփոխությունների հարցում, որից հետո դրանց դեմ արտահայտվողների հետ միասին՝ կսկսեն պայքարել ընդդեմ սահմանադրական փոփոխությունների։
«Չեք անցկացնի» նախաձեռնության անդամ Արմեն Գրիգորյանը տեղեկացրեց, որ մինչ այս պահը քաղաքական ուժերից հանդիպել են միայն «Ժառանգության» փոխնախագահ Արմեն Մարտիրոսյանի հետ։ «Ժառանգության» հետ արդեն հանդիպել ենք, իրենք ասացին, որ դեմ են այդ փոփոխություններին, քանի որ առաջարկներ են ներկայացրել ու դրանք չեն ընդունվել։ Հանդիպել ենք Մարտիրոսյանի հետ, բայց նաեւ ցանկություն ենք հայտնել հանդիպելու կուսակցության նախագահ Րաֆֆի Հովհաննիսյանի հետ՝ ավելի բարձր ու պաշտոնական տեսակետ ունենալու համար»,- ասաց Գրիգորյանը։
Նրա խոսքով, այլ ուժերի հետ հանդիպումներ չեն ունեցել, սակայն հանդիպման խնդրանքով դիմել են մի քանի այլ ուժերի. խոսքը, մասնավորապես, ՀԱԿ-ի եւ ԲՀԿ-ի մասին է։
Կարդացեք նաև
Ինչպես տեղեկացրեց Գրիգորյանը, հանդիպումներ են ունեցել նաեւ քաղաքացիական հասարակության ներկայացուցիչների հետ ու քննարկել են սահմանադրական փոփոխությունների հարցում դեմ լինելու թեման, իսկ խորհրդարանական ուժերին հանդիպելուց հետո պատրաստվում են քննարկումներ սկսել նաեւ արտախորհրդարանականների հետ։ Արտախորհրդարանական ուժերից քննարկումներ կսկսվեն նաեւ «Հայազնի» հետ, որը նույնպես դեմ է արտահայտվել փոփոխություններին, հնարավոր է՝ քննարկումներ սկսվեն նաեւ «Ազատամարտիկների դաշինքի» ու ազատամարտիկների այլ խմբերի հետ, որոնք ի սկզբանե դեմ են եղել սահմանադրական փոփոխություններին։ Գրիգորյանի խոսքով, հնարավորություն կա մոբիլիզացնել ուժ՝ սահմանադրական փոփոխությունների դեմ. «Հավատում եմ, որ հնարավոր է մոբիլիզացնել ուժերը, կան ուժեր, որ դեմ են հանդես եկել, ու այդ ուժերը ունեն որոշակի ռեսուրս»։
Մկրտիչ ԿԱՐԱՊԵՏՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում