Մայիսի 3-ին Տավուշի մարզի Զորական գյուղում հանդիսավորությամբ բացվել են Խորհրդային Միության մարշալներ Հովհաննես Բաղրամյանի եւ Համազասպ Բաբաջանյանի կիսանդրիները եւ 3 խաչքարեր: Միջոցառմանը մասնակցել են ՀՀ պաշտպանության նախարար Սեյրան Օհանյանը, Տավուշի մարզպետ Հովիկ Աբովյանը եւ այլ պաշտոնատարներ: Սեյրան Օհանյանը ընթերցել է Սերժ Սարգսյանի ուղերձը, որտեղ երկրի նախագահը շնորհակալություն է հայտնել հուշարձանը կառուցողներին, ողջունել միջոցառման մասնակիցներին:
Ներկայացվել է նաեւ Խորհրդային Միության մարշալ, ԽՍՀՄ պաշտպանության նախկին նախարար Դմիտրի Յազովի շնորհավորական ուղերձը, որում մարշալը շեշտել է Մեծ հայրենականում տարած հաղթանակում հայ ժողովրդի, մասնավորապես Չարդախլու գյուղի մեծ ներդրումը:
Զորական գյուղում բնակվում են դաշտային Ղարաբաղի Շամխորի շրջանի հռչակավոր Չարդախլու գյուղից փախստականները, ովքեր 1988թ. դեկտեմբերին ստիպված եղան լքել իրենց բնօրրանը, չկարողանալով անգամ իրենց հետ վերցնել գյուղում գտնվող փառքի թանգարանի ցուցանմուշները:
1991թ. ապրիլ-մայիս ամիսներին անցկացված տխրահռչակ «Կոլցո» օպերացիային մասնակցել է Գյանջայում տեղակայված 4-րդ բանակի 23-րդ դիվիզիան: ԽՍՀՄ պաշտպանության նախկին նախարար Դմիտի Յազովը այդ գործողության պատասխանատուներից է, որի ընթացքում հայաթափվեցին Խանլարի շրջանի Մարտունաշեն, Գետաշեն գյուղերը, Հադրութի, Շուշիի, Շահումյանի շրջանների մի շարք գյուղեր:
Կարդացեք նաև
Մենք զանգահարեցինք Զորական համայնքի ղեկավար Սուրեն Մարտիրոսյանին ճշտելու համար, թե ում նախաձեռնությամբ է ներկայացվել մարշալ Յազովի շնորհավորական ուղերձը, սակայն գյուղապետը չպատասխանեց մեր բազմաթիվ հեռախոսազանգերին:
Ոսկան ՍԱՐԳՍՅԱՆ
Լուսանկարը՝ ՀՀ պաշտպանության նախարարության պաշտոնական կայքից