Վրաստանի արտաքին գործերի նախարարությունը հաղորդագրություն է տարածել այն մասին, որ Վրաստանում Հայաստանի դեսպան Յուրի Վարդանյանը հանդիպել է այդ երկրի ԱԳ նախարարի տեղակալ Գիգի Գիգաձեի հետ. հաղորդում է «Грузия Онлайн»-ը:
Գիգի Գիգաձեն ծայրահեղ վրդովմունք է հայտնել «ՀՀ ԱԺ նախագահ Գալուստ Սահակյանի եւ Ցխինվալիի տարածաշրջանի ռուսական օկուպացիոն ռեժիմի ներկայացուցչի, այսպես կոչված՝ խորհրդարանի «խոսնակի» հետ հանդիպման առնչությամբ»:
Վրաստանի ԱԳՆ-ի մամուլի հաղորդագրության համաձայն՝ հանդիպման ընթացքում ընդգծվել է, որ տեղի ունեցածը հակասում է Հայաստանի եւ Վրաստանի ավանդական ընկերական հարաբերություններին եւ լուրջ վնաս է հասցնում երկկողմ հարաբերություններին:
«Վրաստանի արտաքին գործերի նախարարի տեղակալը նաեւ զարմանք է արտահայտել տարածված այն տեղեկատվության առնչությամբ, թե, իբրեւ, հանդիպումը ոչ պաշտոնական բնույթ է ունեցել: Գիգի Գիգաձեի խոսքերով՝ պաշտոնական դեմքի օկուպացիոն ռեժիմի ներկայացուցչի հետ ցանկացած շփում միանգամայն անընդունելի է վրացական կողմի համար»,- ասված է հաղորդագրությունում:
Կարդացեք նաև
Յուրի Վարդանյանն էլ իր հերթին ցավ է հայտնել տեղի ունեցածի առնչությամբ եւ նշել է, որ պաշտոնական Երեւանը անհապաղ կծանոթանա Վրաստանի դիրքորոշմանը:
«Грузия Онлайн»-ի մեկ այլ տեղեկատվության համաձայն՝ Հայաստանում Վրաստանի դեսպան Թենգիզ Շարմանաշվիլին Հայաստանի ԱԳ նախարարի տեղակալ Սերգեյ Մանասարյանի հետ հանդիպումից հետո հայտնել է, թե հայկական կողմին փոխանցել է Վրաստանի ծայրահեղ մտահոգությունը՝ կապված հանդիպման հետ:
Հայաստանի ԱԳ նախարարի տեղակալն էլ իր հերթին տեղեկացրել է, որ Հայաստանը հաստատում է Վրաստանի տարածքային ամբողջականությանը եւ ինքնիշխանությանը իր աջակցությունը եւ ցավ է հայտնել տեղի ունեցածի կապակցությամբ:
Պատրաստեց Աշոտ ԻՍՐԱԵԼՅԱՆԸ