Նախօրեին նախագահական նստավայրի դիմաց ոստիկանների կողմից բռնության ենթարկված Վալերի Մուրադյանի մայրը՝ Նանա Մուրադյանը այսօր դատաբժիշկ Սանասար Սեւոյանի մոտ հրաժարվել է դատաբժշկական փորձաքննություն անցնել:
«Տիկին Իրինայի թեւերին կապտուկներ կան, երբ դատաբժիշկն ինձ ասաց՝ ցույց տվեք ձեր վնասվածքները, ասացի՝ կապտուկներ չկան: Համ էլ ասացի՝ իսկ կին դատաբժիշկ չկա՞, որ նայի: Ասացի՝ ես ձեր դիմաց չեմ պատրաստվում իմ մարմինը ցույց տալ, որ հիանաք ու նայեք»,- Aravot.am-ին պատմեց Նանա Մուրադյանը: Դատաբժիշկը առաջարկել է գրել հենց այդպես, որ վնասվածքներ չի ստացել, տիկին Մուրադյանը չի համաձայնել եւ վերջնական որոշվել է, որ նա կմեկնի տեղամասային պոլիկլինիկա ու կին բժշկի կողմից կհետազոտվի:
Նա նաեւ պատմեց, որ Բաղրամյան 26-ում ոստիկանների հետ միջադեպի ժամանակ, իրեն քաշքշող ոստիկանը, տեսնելով, որ դեպքը նկարահանող լրագրողի տեսախցիկն իր ուղղությամբ չէ, շատ կոշտ ձեւով կճմտել է իր կուրծքը. «Դիտավորյալ կուրծքս կճմտեց ինչ ուժով, որ կուրտկայիս վրայից ես ցավը զգամ: Ինչ անեմ, որ կապտուկը չկա, հետագայում ինչ իմանամ՝ ինչ կլինի: Կուրծքը կնոջ ամենազգայուն ու նուրբ մասն է: Դրա համար պահանջել եմ մամոգրաֆիական ստուգում անցնել: Պետք է գնամ մեր տեղամասային բժիշկը նայի»:
Հիշեցնենք, որ երեկ նախագահի նստավայրի դիմաց ոստիկանները հրել ու քաշքշել են բողոքի ակցիա անող բանակում խաղաղ պայմաններում մահացած զինվորների 5 ծնողներին և նրանց բռնի ուժով տեղափոխել դիմացի մայթ՝ Մարշալ Բաղրամյան մետրոյի կայարանի մոտ։
Կարդացեք նաև
Արփինե ՍԻՄՈՆՅԱՆ
