Բազմիցս խոսվել է ինչպես Համազգային և Մնջախաղի պետական թատրոնների շենքերի կառուցման, այնպես էլ Խորեն Պալյանի և Լուսինե Զաքարյանի բնակարանի խնդրի լուծման մասին:
Լրագրողների խնդրանքով ՀՀ մշակույթի նախարար Հասմիկ Պողոսյանն այսօր անդրադարձավ այդ խնդիրներին:
«Համազգային և Մնջախաղի պետական թատրոնների շենքերի կառուցումը օրակարգային հարցեր են: Բայց երևի դուք էլ, եթե համեմատության մեջ դնեիք, առաջնային կհամարեիք Կոմիտասի թանգարան-ինստիտուտի կառուցումը: Պետք է, չէ՞, որ նախ Կոմիտասի թանգարան ունենայինք: Իհարկե, շատ լավ է, երբ թատրոնն իր առանձին հարթակն է ունենում և առավել լիարժեք է գործում, բայց առաջնահերթության խնդիր կա»,- ասաց նախարարը:
Ինչ վերաբերում է Խորեն Պալյանի և Լուսինե Զաքարյանի բնակարանի խնդրի լուծմանը, Հ. Պողոսյանն ասաց, որ նախարարությունն այդ թեմայով պարբերաբար շփվում է բարեկամների հետ:
Կարդացեք նաև
Հիշեցնենք, որ մտավորականների բնակարանն անմխիթար վիճակում է գտնվում: Շատերը պահանջում են ՀՀ մշակույթի նախարարությունից զբաղվել Խորեն Պալյանի և Լուսինե Զաքարյանի բնակարանի հարցով, մանավանդ որ երգչուհին ինքն էլ էր երազում այն տուն-թանգարանի վերածելու մասին: Սակայն Մշակույթի նախարարությունից բազմիցս պատասխանել են, որ քանի դեռ բնակարանը սեփականատերեր ունի, նախարարությունը ոչինչ չի կարող անել առանց նրանց համաձայնության: Կարելի է միայն սպասել նրանց «բարի կամքի» դրսևորմանը:
Իսկ «բարի կամք դրսևորողները» պիտի լինեն Խ. Պալյանի եղբայրը՝ Արտաշես Պալյանը, նրա որդին՝ Րաֆֆի Պալյանը, քրոջ որդին՝ Ռուբեն Ռուբինյանը և մյուս եղբոր՝ Երկաթ Պալյանի երեխաները՝ Արություն և Ալեն Պալյանները, որոնք էլ մտավորականների մահից հետո դարձել են բնակարանի սեփականատերերը, քանի որ Խորեն Պալյանը և Լուսինե Զաքարյանը զավակներ չեն ունեցել:
«Մոտ երկու ամիս առաջ ենք զրուցել բարեկամներից մեկի հետ: Նա ասաց, որ փորձում են լուծել ներընտանեկան խնդիրները, և խոստացավ, որ մինչև սեպտեմբեր հանդես կգան որոշակի առաջարկությամբ: Այնպես որ, խնդրի լուծումն այսօր բացառապես կախված է մտավորականների բարեկամներից: Երբ նրանք՝ բնակարանի սեփականատերերը, իրենց ներքին հարցերը լուծեն, խնդիրը կփոխանցեն պետությանը: Կարևորն այն է, որ երկխոսությունը կա»,- ասաց Հ. Պողոսյանը:
Սիրանուշ ՀԱՅՐԱՊԵՏՅԱՆ
