Թուրքիայի նախագահ Ռեջեփ Թայիփ Էրդողանն այսօր այդ երկրի քաղաքական ուժերին կոչ է արել պատասխանատու վարվել, ապահովել կայունություն այն բանից հետո, երբ ընտրություններից հետո պարզ է դարձել, որ իր կուսակցությունը չի կարողացել բացարձակ մեծամասնություն կազմել խորհրդարանում. հաղորդում է «Digital Journal»-ը:
«Այս նոր գործընթացում շատ կարեւոր է, որ բոլոր քաղաքական ուժերը պատասխանատու վերաբերմունք եւ անհրաժեշտ զգայություն ցուցաբերեն, որոնք անհրաժեշտ են պահելու կայունությունը եւ վստահությունը մեր երկրում ու մեր ժողովրդավարական ձեռքբերումները»,- այսօր տարածված հայտարարությունում, մասնավորապես նշել է Էրդողանը:
Հիշեցնենք, որ երեկ տեղի ունեցած ընտրությունների արդյունքում իշխող Արդարություն եւ զարգացում կուսակցությունը ստացել է ձայների 43 տոկոսը: Նրան են հետեւում Ժողովրդա-հանրապետական, Ազգայնական շարժում եւ հայամետ Ժողովուրդների դեմոկրատական կուսակցությունները, որոնք համապատասխանաբար ստացել են 24, 17 եւ 11 տոկոս ձայներ:
Էրդողանը նաեւ ասել է, որ որեւէ կուսակցություն չի ստացել բացարձակ մեծամասնություն եւ սա «իրական եւ առողջ» քարոզարշավի արտացոլումն է. «Ամենաբարձր մասնակցությամբ ընտրություններն արտացոլում են ժողովրդավարությանն ուղղված մեր սիրելի ժողովրդի կամքը եւ նրա հանձնառությունը»:
Կարդացեք նաև
Պատրաստեց Աշոտ ԻՍՐԱԵԼՅԱՆԸ
