Քիչ առաջ ոստիկանության աշխատակիցները Բաղրամյան պողոտայում լրագրողներին եւ բողոքի ակցիայի կազմակերպիչներին ցուցադրեցին տեսանյութ, որում երեւում է աղբամաններից պատրաստված բարիկադների վրա կանգնած մի քաղաքացի, ձեռքին երկար փայտ:
«Քաղաքացիական պայմանագիր» կուսակցության անդամ Վիլեն Գաբրիելյանը (Նավակ Ճոճողը) Երեւանի փոխոստիկանապետ Վալերի Օսիպյանի հետ զրույցում պարզաբանեց, որ այդ փայտը եղել է պաստառներից մեկինը եւ պոկվել է: Նա նաեւ ասաց, որ տեսանյութում երեւացող անձը այդ փայտի միջոցով աղբամանների արանքում գտնվող շշերն էր հանում:
Վալերի Օսիպյանն էլ հակադարձեց, թե չի երեւում, որ շիշ են հանում: «Ես տեսնում էի, որ իրենք բացահայտ կանգնած թափահարում էին: Ոստիկանությանը ցուցադրում էին, որ մենք ի վիճակի ենք դիմադրելու»:
Վիլեն Գաբրիելյանըը Օսիպյանի այս դիտարկմանը պատասխանեց, որ անձամբ է այդ փայտը վերցրել, կոտրել, դրել տոպրակի մեջ եւ տարել թափել, քանի որ նկատել է, որ դա գրավել է ոստիկանության ուշադրությունը: «Էն օրվա խոսակցությունն ա էլի, որ Դուք մեկնաբանում եք նենց ոնց, որ Ձեզ է պետք, մենք մեկնաբանում ենք նենց ոնց, որ մեզ է պետք»,- ասաց նա:
Կարդացեք նաև
Լրագրողի հարցին, թե տեսանյութում երեւացող փայտը դեն նետելուց հետո, այլ փայտեր հանդիպե՞լ են, Օսիպյանը պատասխանեց, որ չեն հայտնաբերել. «Երեւի պահել են»:
Աշոտ ԻՍՐԱԵԼՅԱՆ
