«Ադրբեջանն իր ռազմական բոլոր ավանտյուրաներում լավ հաշվարկել ու հետևում էր ՀՀ իրադարձություններին»,-այսօր «Փաստարկ» մամուլի ակումբում լրագրողների հետ հանդիպմանը հայտարարեց Միջազգային և անվտանգության հարցերի հայկական ինստիտուտի ղեկավար Ստեփան Սաֆարյանը: Ըստ նրա` հատկապես Ադրբեջանի նախագահին մոտ կանգնած լրատվամիջոցներին հետևելով պարզ է դառնում, որ անցյալ տարվա ամառային արկածախնդրությունից առաջ և այժմ, նկատելի է այն, որ նրանք հաշվարկում էին, որ քառյակը շուտով կմոբիլիզացվի և «Դեմ եմ»-ը կակտիվանա, երկու թևերն իրար կաջակցեն ու ներքին առումով կթուլանան ու արժի գնալ մի քայլի, որը կբերի հաջողության: Եվ բավական է մեկ անհաջողություն սահմանի վրա, ընդդիմությունը կսկսի իշխանությանը մեղադրել ու քաոսի մեջ իրենք կհաջողեն:
Aravot.am-ի հարցին` հնարավո՞ր է ՀՀ ներքաղաքական զարգացումների ֆոնի վրա Ադրբեջանը գնա սահմանային լարվածության ավելացման, պարոն Սաֆարյանը պատասխանեց. «Այն, որ ՀՀ ներքաղաքական գործոնը կա, դրա վկայությունն էր մայիսի 28-ի ելույթը, որով Ալիևը հորդորում էր հայ ժողովրդին ազատվել իր իշխանություններից: Դա ՀՀ աշխարհաքաղաքական գործոնի հաշվառման վկայությունն էր: Նախիջևանի սահմանին տեղի ունեցածը լուրջ ազդանշան էր հասկանալու, որ, այո, ներսում ապակայունացման դեպքում Ադրբեջանն օգտագործելու է պահը, ինչը արել է 2008-ի մարտի 4-ին: Դա նոր դինամիկա չէ»:
Տաթև ՀԱՐՈՒԹՅՈՒՆՅԱՆ
