Մաթեմատիկայի նկատմամբ հետաքրքրություն առաջացնող «Կենգուրու» միջազգային մրցույթին այս տարի շուրջ 45 հազար աշակերտ է մասնակցել հայաստանյան և արցախյան տարբեր դպրոցներից:
Մրցույթն այս տարի 4 հայ հաղթող ունի՝ Վանաձորի Պ. Տիչինայի անվան թիվ 20 միջնակարգ դպրոցի 5-րդ դասարանի աշակերտ Էրիկ Մելիքյանը, «Ուսում» հանրակրթական դպրոցի 6-րդ դասարանի աշակերտ Արտաշես Գյոլեցյանը, Գյումրու «Պրոգրես» համալսարանի հենակետային դպրոցի 6-րդ դասարանի աշակերտ Սերյոժա Դանիելյանը և ԵՊՀ-ին առընթեր Ա. Շահինյանի անվան ֆիզիկամաթեմատիկական հատուկ դպրոցի 10-րդ դասարանի աշակերտ Սերգեյ Ներսիսյանը:
Այս մասին այսօր լրագրողների հետ հանդիպման ժամանակ տեղեկացրեց «Այբ» կրթական հիմնադրամի գործադիր տնօրեն Դավիթ Սահակյանը: Նրա խոսքով՝ չորս հաղթողներն առավելագույն արդյունքներն են արձանագրել:
Կարդացեք նաև
«Որպեսզի երեխաները հասկանան, որ կրթությունն իրենց ճանապարհն է և կրթության միջոցով կարող են կայանալ, շատ կարևոր է, որ փոքր տարիքից իրենց գիտելիքները փորձարկեն: Այս մրցույթով երեխաները միջազգային մեծ շարժման մասնակից են դառնում: Ամեն տարի նույն օրը 7 միլիոն երեխա ամբողջ աշխարհում փորձում են իրենց ուժերը: Մրցույթը մասսայական է, թույլ է տալիս ցանկացած երեխայի փորձել իր ուժերը»,- հավելեց Դավիթ Սահակյանը:
Սիրանուշ ՀԱՅՐԱՊԵՏՅԱՆ
