Լեռնային Ղարաբաղի Հանրապետության արտաքին գործերի նախարարի մամուլի քարտուղար Անի Սարգսյանի պատասխանը Aravot.am-ի հարցին.
– Ադրբեջանցի իրավապաշտպան Էլչին Բեհբուդովը հայտարարել է, որ «Թող ամբողջ աշխարհը տեսնի, ինչպիսի հումանիտար քայլեր է անում Ադրբեջանը: Հայ ռազմագերի Անդրանիկ Գրիգորյանը Ադրբեջանում պահվում է լավ պայմաններում, մինչդեռ ԼՂՀ-ում վատ են վերաբերվում Շահբազ Գուլիեւի եւ Դիլհամ Ասկերովի հետ»: Էլչին Բեհբուդովը այդ հարցով պատրաստվում է դիմել միջազգային կազմակերպություններին: Ինչպե՞ս կմեկնաբանեք սա։
– Էլչին Բեհբուդովը յուրահատուկ մոտեցում ունի «լավ պայմաններում պահվելու» առնչությամբ։ Թերեւս, շնորհիվ Ադրբեջանի Ազգային անվտանգության նախարարի հետ ջերմ բարեկամական հարաբերությունների, որոնցով նա այնքան սիրում է հպարտանալ, Էլչին Բեհբուդովը ձեռք է բերել վերջին տարիներին Ադրբեջանում սովորական երեւույթ դարձած հայ գերիներին տանջելու, սպանելու կամ քարոզչական նպատակներով օգտագործելու փաստերը չնկատելու հմտություն։ Ադրբեջանի կողմից միջազգային մարդասիրական իրավունքի նորմերի հենց այս կոպտագույն խախտումներին է ականատես լինում ամբողջ աշխարհը։
Ինչ վերաբերում է ԼՂՀ տարածքում մի շարք ծանր հանցագործություններ կատարած եւ դրանց համար դատապարտված ադրբեջանական հետախուզական-դիվերսիոն խմբի անդամներ Դիլհամ Ասկերովի եւ Շահբազ Գուլիեւի պահման պայմաններին, ապա համոզված եմ, որ Էլչին Բեհբուդովը քաջատեղյակ է, որ նրանց պահման պայմանները համապատասխանում են միջազգային ստանդարտներին։ Այս փաստը ադրբեջանական մամուլի իսկ վկայությամբ ընթացիկ տարվա սկզբին հաստատել է ՄԿԽԿ ղեկավար Պետեր Մաուրերը։ Ի տարբերություն Ադրբեջանի, ԼՂՀ-ն հավատարիմ է միջազգային մարդասիրական իրավունքի նորմերը հարգելու եւ կատարելու իր կողմից ստանձնած պարտավորություններին։
Կարդացեք նաև
Աշոտ ԻՍՐԱԵԼՅԱՆ
