Ադրբեջանի Խոշտանգումների դեմ կոմիտեի ներկայացուցիչ, իրավապաշտպան Էլչին Բեհբուդովը, նրա տեղակալ Էլչին Շիրինովը եւ օգնական Բահման Իմանովը հանդիպել են այդ երկրում գերության մեջ գտնվող ԼՂՀ նախկին զինծառայող Արսեն Գրիգորյանին:
«Apa»-ի հետ զրույցում Բեհբուդովն ասել է, որ Անդրանիկ Գրիգորյանը պահման պայմաններից եւ իր հանդեպ վերաբերմունքից որեւէ բողոք չունի. «Ա. Գրիգորյանը ինքնակամ է անցել ադրբեջանական կողմ: Զրույցի ընթացքում նա մեզ ասել է, որ իր հետ շատ լավ են վերաբերվում. օրը 3 անգամ կերակրում են, շաբաթը 3-4 անգամ կարողանում է լողանալ, մաքուր օդին զբոսնել»:
Հայ ռազմագերին նաեւ փոխանցել է, որ իր սենյակում կա հեռուստացույց: Նա հետեւել է Եվրոպական խաղերին եւ նկարչությունով է զբաղված. «Անդրանիկն ասել է, որ այն զորամասում, որտեղ ինքն էր ծառայում, շատ վատ պայմաններ էին: Վաշտի հրամանատար Սուրեն Բալայանը եւ այլ զինծառայողներ իրեն պարբերաբար ծեծել են: Կարմիր խաչի միջազգային կոմիտեի ներկայացուցիչները նրան հաճախ են այցելում, ինչի շնորհիվ Անդրանիկը կարողանում է ընտանիքին նամակներ ուղարկել: Նա նաեւ ասել է, որ կարոտում է իր սիրած աղջկան»,- ասել է Էլչին Բեհբուդովը:
Ադրբեջանցի իրավապաշտպանը նաեւ նշել է, որ հանդիպման նպատակը Գրիգորյանի պահման պայմաններին ծանոթանալն է եղել. «Թող ամբողջ աշխարհը տեսնի, ինչպիսի հումանիտար քայլեր է անում Ադրբեջանը: Հայ զինծառայողն այստեղ պահվում է լավ պայմաններում: Սակայն հայերը վատ են վերաբերվում իրենց մոտ պահվող ադրբեջանցի գերիներ Շահբազ Գուլիեւի եւ Դիլհամ Ասկերովի հետ: Ես այդ հարցով կդիմեմ միջազգային կազմակերպություններին»:
Կարդացեք նաև
Պատրաստեց Աշոտ ԻՍՐԱԵԼՅԱՆԸ
