Այս պահին նաիրիտցիները փակել են Բագրատունյաց պողոտան: Քիչ առաջ Aravot.am-ը կապ հաստատեց «Նաիրիտ» գործարանի նախկին աշխատակից, համակարգող խմբի անդամ Անուշ Հարությունյանի հետ: Նա մեզ փոխանցեց, որ նաիրիտցիները դիմել են այդ քայլին, քանի որ խիստ վրդովված են, որ իրենց տրված խոստումը չի կատարվում:
Հիշեցնենք, որ մոտ երեք շաբաթ առաջ վարչապետն անձամբ խոստացել էր, որ նաիրիտցիների աշխատավարձի պարտքը ամբողջությամբ կմարվի մինչև հուլիսի 15-ը: Մինչդեռ այսօր «Նաիրիտ»-ի տնօրեն Ռուբեն Սաղաթելյանն իր մոտ է հրավիրել ցույցերը համակարգող խմբի անդամներին՝ տեղեկացնելով, որ պարտքը կմարվի միայն այն դեպքում, եթե աշխատակիցները գրավոր պարտավորություն ստորագրեն, որ հետագայում չեն պահանջելու աշխատավարձի չվճարման հետ կապված տույժերն ու տուգանքները:
Պարտավորության ստորագրման մասին Անուշ Հարությունյանը մեզ հետ զրույցում ասաց. «Մարդիկ պահանջում են, որ իրենց աշխատավարձը վճարվի ամբողջությամբ, ինչը խոստացել էր վարչապետը: Բայց այսօր պարզվեց, որ վաղը գումար չի լինելու, դրա համար էլ փողոցը պիտի փակվի»:
Անուշ Հարությունյանն ասաց, որ իրենք դեմ չեն այդ թղթերը ստորագրելուն, բայց նաև նշեց. «Պարզվում է, որ այդ թղթերը պատրաստելու համար 3-4 օր ժամանակ է պահանջվում, դրանից հետո էլ մեկ շաբաթ է պետք, որ գումարը նստացնեն մեր հաշվին: Մենք հո լակոտ չե՞նք, հո երեխա չե՞նք, ինչքա՞ն կարող են մարդկանց խաբել»:
Կարդացեք նաև
Մեզ հետ զրույցի ընթացքում Անուշ Հարությունյանից ոստիկանները պահանջում էին բացել պողոտան, նա էլ վրդովված ասում էր. «Մարդիկ իրավունք ունեն մեր փողերը չտալ, մենք իրավունք չունե՞նք փողոց փակել»:
Տաթև ՀԱՐՈՒԹՅՈՒՆՅԱՆ
