Ինչպես տեղեկացրել ենք, գյումրեցի ակտիվիստները ժամանակ էին տվել իշխանություններին՝ պահանջելով անհապաղ կարճել հոսանքի թանկացման դեմ պայքարող տնտեսագետ-դասախոս Կարեն Պետրոսյանի նկատմամբ խուլիգանության հատկանիշներով հարուցված քրեական գործը: Այսօր երեկոյան լրանում է այդ վերջնաժամկետը: Պահանջը չբավարարելու դեպքում գյումրեցիները կսկսեն անհնազանդության ակցիաներ: Ակտիվիստները պահանջում էին նաեւ Շիրակի մարզի նորանշանակ ոստիկանապետ Գրիշա Ամիրխանյանի հրաժարականը, որը հունիսի 23-ին Գյումրիի Թատերական հրապարակում պատռել էր նստացույց անող երիտասարդների ցուցապաստառները: Բացի այդ, ոստիկանապետն ու նրա ենթակաները բռնի ուժով ու քաշքշելով 13 նստացուցարարների բերման էին ենթարկել ոստիկանության «Կումայրի» բաժին:
Aravot.am-ը Կարեն Պետրոսյանից հետաքրքրվեց, թե ոստիկանապետի հրաժարականի մասին իրենց պահանջը շարունակո՞ւմ է ուժի մեջ մնալ: «Այո, ոստիկանապետի հրաժարականը ուժի մեջ է, մենք ավելի սիրուն ձեւակերպում ունենք՝ «ավելի բարեփոխված Շիրակի ոստիկանապետ», որովհետեւ իրենց փիլիսոփայությունը բարեփոխումն է, մենք էլ ասում ենք՝ ավելի բարեփոխված ոստիկանապետ: Հիմա Վովա Գասպարյանը ոստիկանապետին կտեղափոխի, կամ բարոյախրատական աշխատանքներ կանի, կամ կուղարկի, ասենք, որեւէ վանական համալիր ճգնելու, կամ աղոթքներ կսովորեցնի, կամ ապաշխարության կկոչի, դա Վովա Գասպարյանի խնդիրն է: Մենք դա դիտում ենք.
ա) հրաժարականի տեսքով,
բ). Հետեւի իր վերադասի օրինակին ու պաշտոնական ներողություն խնդրի նրանցից, ում նկատմամբ ապօրինություն է կատարել: Նույն ոստիկանների ապօրինի գործողությունները, որոնք կատարվել են իր հրամանով, իր ներողությամբ վերցնի իր վրա:
Կարդացեք նաև
Գիտեք, այդ համակարգում ֆեոդալական կարգեր են ու օբյեկտիվորեն կամ սուբյեկտիվորեն ինքը իր ներողությամբ կամ իր հրաժարականով կամ զղջմամբ կամ ապաշխարությամբ կարող է քավել այն ոստիկանների մեղքը, որոնք օրենքով սխալ գործողություն են իրենց թույլ տվել»:
Կարեն Պետրոսյանը նաեւ ասաց, որ ինքը պաշտպանելու է իր սոցիալական կարգավիճակը: «Եթե իմ նկատմամբ հարուցված քրեական գործը չի կարճվում, ես իմ մասով գոնե իրավական ու բարոյական պաշտպանության ամբողջ հնարավորություններից օգտվելու եմ: Նաեւ քաղաքացիական՝ այն մասով, որ սոցիալական իմ ստատուսն եմ պաշտպանելու: Անձի սոցիալական կարգավիճակ կա, իրենք կպել են սոցիալական կարգավիճակ ունեցող անձի, մտավորականության ներկայացուցչի, կարեւոր չէ, դա Կարենն է, Տիգրանն է, Պողոսն է, Սիմոնն է, իրենք կպել են կարգավիճակ ունեցող անձի: Եվ ես՝ որպես Հայաստանի Հանրապետության քաղաքացի՝ պաշտպանելու եմ այդ անձի կարգավիճակը»,- ասաց Կարեն Պետրոսյանը:
Նունե ԱՐԵՎՇԱՏՅԱՆ
