«Ոտքի Հայաստանը» քաղաքացիական շարժման անդամ Դավիթ Սանասարյանը այսօր կիսվել է Երեւանի եւ մարզերի բնակիչների հետ հանդիպումների տպավորություններով:
«Սերժ Սարգսյանի հայտարարությունից հետո կա մոլորություն, հիմնականում մարդիկ կարծում են՝ հարցը լուծված է, խնդիր չկա, եւ եթե խնդիր լինի, կլինի քաղաքացիական նոր պայքար, խնդրին միասնական լուծում կտանք…շատերի մոտ կա պատկերացում, որ եթե կառավարությունը մի քանի ամսից դադարեցնի սակագնի բարձրացման սուբսիդավորումը, նորից հնարավոր կլինի բողոքի ակցիաների միջոցով զսպել էլեկտրաէներգիայի թանկացումը: Այդ պատկերացումը սխալ է, կառավարության կողմից սուբսիդավորման ցանկացած աղբյուր նորից մեր գրպանից է:
Բացի դա Հանրային ծառայությունները կարգավորող հանձնաժողովի որոշումը չչեղարկելու դեպքում, օգոստոսի մեկին այն իրավական ուժ կստանա, այդ դեպքում որոշումը վիճարկելն ու փոփոխելը հնարավոր կլինի միայն դատական կարգով: Վստահ ենք՝ այն փակուղի տանող ճանապարհ է: Իրադարձությունների նման զարգացման դեպքում Բաղրամյան պողոտայում օրեր շարունակ տեւող բոլորիս ջանքերն ապարդյուն են դառնալու»,- ասաց Դավիթ Սանասարյանը:
Ըստ նրա, էլեկտրաէներգիայի սակագնի թանկացման սպառնալիքը հնարավոր է վերացնել մինչեւ օգոստոսի մեկը:
Կարդացեք նաև
Նա նաեւ պատմեց, որ հանդիպել է ԵԱՀԿ ԺՄԻԳ տնօրենի հետ, ներկայացրել հավաքների ազատությունների ու խոչընդոտների վիճակը: Ասաց նրանք անհանգստացած էին վերջին դեպքերով ու հետաքրքրված սահմանադրական բարեփոխումներով:
«Ներկայացրել եմ նաեւ այս օրերին բողոքի ակցիաների ժամանակ իշխանությունների գործողությունները, ներկայացրել իրենց դիրքորոշումը: Տեղեկացրել եմ, որ ոստիկանությունը քաղաքական քայլեր է իրականացնում, որ դա անընդունելի է մեզ համար: Տեղեկացրել եմ նաեւ Գյումրու մեր պայքարակից Կարեն Պետրոսյանի դեմ հարուցված քրեական գործի մասին, որ անհիմն գործ են սարքել, որ առաջին շարքում կանգնած քաղաքացիներին հետ պահեն բողոքի ակցիաներից: Խոսել եմ սահմանադրական կարգի մասին, տեղեկացրել, որ իմ ունեցած պատկերացումներով քաղաքացիական հասարակության եւ քաղաքական ուժերի մի մասի միջեւ առաջիկայում լինելու է բոյկոտի կոնսոլիդացիա, քննարկումները նոր են սկսվել ու առաջիկայում ականատես կլինենք՝ ինչ զարգացումներ կլինեն»:
Արփինե ՍԻՄՈՆՅԱՆ
