ՀՀ անշարժ գույքի պետական կադաստրը, ամփոփելով այս տարվա առաջին կիսամյակում ՀՀ անշարժ գույքի շուկայում արձանագրված միտումները, հանգել է եզրակացության, որ մասնավորապես՝ Երեւանի բազմաբնակարան շենքերում բնակարանի մեկ քառակուսի մետրի միջինացված գինը, անցած տարվա նույն ժամանակահատվածի համեմատ, նվազել է 600 դրամով կամ՝ 0.2 տոկոսով։ Բայց սա՝ դրամով հաշվարկելու դեպքում։ Անշարժ գույքը Հայաստանում միշտ էլ գնահատվում է դոլարով։
Հաշվի առնելով դրամի արժեզրկումը՝ բնակարանները մեկ տարվա ընթացքում էժանացել են ավելի քան 14 տոկոսով։ Ուշագրավ է, որ նույնիսկ բնակարանների այդչափ էժանացման պայմաններում արձանագրվել է առուվաճաոքի գործարքների կտրուկ նվազում։ Օրինակ՝ Երեւանում բնակարանների առուվաճառքի գործարքների թիվը, անցած տարվա առաջին կիսամյակի համեմատ, նվազել է 26.7 տոկոսով։ Իսկ Հայաստանի ողջ տարածքում բազմաբնակարան շենքերում գտնվող բնակարանների առուվաճառքների թիվը նշված ժամանակահատվածում նվազել է 34.2 տոկոսով։
Նույնն է պատկերը անշարժ գույքի մյուս՝ առանձնատների սեգմենտում։ Չնայած գների կտրուկ անկմանը՝ առուվաճառքի գործարքների թիվը նույնպես կտրուկ նվազել է։ Երեւանում այդ նվազումը կազմել է 7.9 տոկոս, իսկ մարզերում՝ 22.4 տոկոս։
Հիփոթեքային շուկայի վիճակը նույնպես տխուր է։ Ըստ կադաստրի հրապարակած տվյալների, Հայաստանում հիփոթեկային գործարքների թիվը այս տարվա առաջին կիսամյակում եղել է ընդամենը 609: Դրանց մեծագույն մասը կամ՝ 447-ը՝ Երեւանում։ Անցած տարվա նույն ժամանակահատվածի համեմատ՝ հիփոթեկային գործարքների թիվը, ընդհանուր առմամբ, Հայաստանում նվազել է 39.2 տոկոսով։
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
