«Եթե մենք հանկարծ զրկվենք Մարզահամերգային համալիրից, մենք ոչ թե կզրկվենք շենքից, այլ մենք կզրկվենք բավականին մեծ մշակույթից»,- օգոստոսի 19-ին «Բլից ինֆո» մամուլի ակումբում լրագրողների հետ հանդիպման ընթացքում ասաց ճարտարապետ, «Կարեն Դեմիրճյանի անվան մարզահամերգային համալիրի» համահեղինակ Գուրգեն Մուշեղյանը:
Նրա խոսքերով՝ տարածաշրջանում պետք է նման կառույց լինի, որպեսզի հնարավոր լինի ներգրավել միջազգային միջոցառումներին. «Այդ տեսանկյունից՝ շատ լավ կլիներ, որ պետության սեփականությունը լիներ, որովհետեւ կան կառույցներ, որ անկախ նրանից՝ եկամտաբեր է, թե եկամտաբեր չէ, բայց ազգի, ժողովրդի, քաղաքի համար պետք է, ինչպես Օպերայի թատրոնն է, ինչպես Սունդուկյանի անվան դրամատիկական թատրոնն է: Այսինքն՝ նրանք չեն աշխատում որպես եկամտաբեր կառույցներ, այլ պահպանվում են նրա համար, որովհետեւ պետք է ժողովրդին, պետք է մեր ազգին, պետք է մեր պատմությանը: Ծիծեռնակաբերդի կառույցը դրանց շարքում է, որ դա ինչպես մնացած ռազմավարական կառույցները, շատերը, որ սեփականաշնորհվել են, պետությունը, իհարկե, դժվարություններ քաշում է, բայց գոնե հնարավորություն ունի վատ կառավարման պարագայում փոխել կառավարման մարդկանց»:
Գուրգեն Մուշեղյանը հավելեց, որ կա կառավարության կողմից հաստատված հատակագիծ, որ այդ տարածքում բացի այդ կառույցներից ուրիշ ոչինչ նախատեսված չէ. «Այսինքն՝ որեւէ բան այնտեղ ավելացնելու համար պետք է փոխվի հողի կատեգորիան՝ հանրային տարածքից վերածվի խառը կառուցապատման գոտու»:
Ամի ՉԻՉԱԿՅԱՆ
