ՀՀ ազգային վիճակագրական ծառայության ընթացիկ-օպերատիվ ամփոփմամբ ստացված (2015թ. օգոստոսի 20-ի դրությամբ) նախնական հիմնական մակրոտնտեսական ցուցանիշների համաձայն 2015 թվականի հունվար-հուլիսին տնտեսական ակտիվության ցուցանիշը (ՏԱՑ) կազմել է 4.2%: Միաժամանակ, հուլիս ամսվա ՏԱՑ-ը հունիս ամսվա նկատմամբ կազմել է 9.2%, իսկ հուլիսը նախորդ տարվա հուլիսի նկատմամբ` 4.0%:
Տնտեսական ակտիվության ցուցանիշի աճին նպաստել են բոլոր ճյուղերը, բացառությամբ` առևտրի շրջանառության, որը կրճատվել է 4.7%-ով` հունվար-հունիսի 5.1% դիմաց (առևտրի շրջանառության մեջ մտնում են մանրածախ և մեծածախ առևտուրը և ավտոմեքենաների առևտուրը): Ծառայությունների աճը կազմել է 2.4%, գյուղատնտեսության աճը` 14.8% և շինարարության աճը` 0.4%:
Կարդացեք նաև
Առևտրի շրջանառության ցուցանիշի նվազումը հունվար-հուլիսին որոշակի դանդաղել է: Այն արդյունք է հիմնականում խանութների միջոցով իրականացվող առևտրի ծավալների ամսական կտրվածքով աճի: Մասնավորապես 2015թ. հունիս ամսին մայիս ամսվա նկատմամբ խանութների միջոցով իրականացվող առևտրի ծավալն աճել է 10.4%-ով, իսկ մայիսը ապրիլի նկատմամբ` 6.3%-ով:
Առևտրի շրջանառության ծավալի աճը
2015թ. 2014թ. նույն ժամանակաշրջանի համեմատ, աճողական, %
Ներքին առևտրի ցուցանիշի նվազումը շարունակում է հիմնականում պայմանավորված մնալ առաջին հերթին արտաքին մասնավոր տրանսֆերտների ծավալի կրճատմամբ, որը 2015թ. հունվար-հունիսին նախորդ տարվա նույն ժամանակաշրջանի համեմատությամբ նվազել է 28.4%-ով: Ընդ որում, միջին ամսական անվանական աշխատավարձի աճին զուգահեռ նկատելի է ամսական կտրվածքով տրանսֆերտների ծավալների նվազման դանդաղում:
Արդյունաբերության աճը հունվար-հուլիսին կազմել է 4.1%: Ըստ ՀՀ էկոնոմիկայի նախարարության հաշվարկների` արդյունաբերական արտադրանքի ֆիզիկական ծավալի ինդեքսն առանց էներգետիկայի հունվար-հուլիսին կազմել է 107.2%:
Տարեսկզբից սկսած արդյունաբերության աճը դրական միտում ունի (արդյունաբերության ըստ գործունեության տեսակների 2015թ. հունվար-հուլիսի ցուցանիշները ՀՀ ազգային վիճակագրական ծառայության կողմից կհրապարակվեն օգոստոսի 31-ին, որի հիման վրա կտրվեն լրացուցիչ մեկնաբանություններ):
Արդյունաբերական արտադրանքի ծավալի աճը
2015թ. 2014թ. նույն ժամանակաշրջանի համեմատ, %
ՀՀ էկոնոմիկայի նախարարության կողմից իրականացված մոնիտորինգի արդյունքների համաձայն աճ է գրանցվել և հանքագործական արդյունաբերության ու բացահանքերի շահագործման, և մշակող արդյունաբերության ճյուղերում, համապատասխանաբար` 17.7% և 2.3%: Մշակող արդյունաբերությունում թողարկման աճ (անվանական աճ) է գրանցվել սարքաշինության ենթաճյուղում. աճի տեմպը կազմել է 136.1%, քիմիայի և դեղագործական արդյունաբերությունում` 114.0%, թեթև արդյունաբերությունում` 111.1%, սննդի արդյունաբերությունում` 104.1%, մետալուրգիայում` 102.7%: Վերը նշված ճյուղերի կողմից թողարկվող արտադրանքի ծավալը կազմում է մոնիտորինգում ընդգրկված մշակող արդյունաբերության կազմակերպությունների կողմից արտադրանքի թողարկման 95.3%-ը: Արտահանման աճ է գրանցվել հանքագործական արդյունաբերության և բացահանքերի ճյուղում. աճի տեմպը կազմել է 143.0%, մշակող արդյունաբերության ենթաճյուղերից քիմիա և դեղագործական ենթաճյուղում` 109.5%, սննդի արտադրությունում` 107.6% և փայտամշակում ենթաճյուղում` 108.9%:
Ընդ որում, հանքագործական արդյունաբերության և բացահանքների շահագործում ճյուղում արտահանման ծավալների աճը գրանցվել է ճյուղի հիմնական արտադրատեսակների (պղնձի և մոլիբդենի) 2015թ. 2014թ. համեմատությամբ համաշխարհային գների էական նվազման պայմաններում:
Արտաքին առևտրաշրջանառությունը կրճատվել է 24.0%-ով, արտահանումը` 4.4%-ով, իսկ ներմուծումը` -30.7%-ով: Նշված աճերը համեմատական չեն նախորդ ամիսների աճողական ցուցանիշների հետ, քանի որ 2015թ. հուլիսի արտաքին առևտրի ցուցանիշներն ամբողջական չեն` պայմանավորված ԵՏՄ երկրների միջև փոխադարձ առևտրի ցուցանիշների ոչ ամբողջական հավաքագրմամբ, որոնք հետագայում ենթակա են ճշգրտման:
Էկոնոմիկայի նախարարության հաղորդագրություն
