Սմբատ Հակոբյանը համարում է, որ կատարվածը քաղաքական մահափորձ է
«Ազատամարտիկների դաշինքի» անդամ Սմբատ Հակոբյանը, որը սեպտեմբերի 21-ին ծեծի էր ենթարկվել, հինգշաբթի՝ հոկտեմբերի 1-ին, իր տանը ասուլիս էր հրավիրել: Ասուլիսի ընթացքում նա ընթերցեց իր եւ Հայաստանի ֆուտբոլի ֆեդերացիայի նախագահ Ռուբեն Հայրապետյանի խոսակցության սղագրությունը: Խոսակցությունը տեղի է ունեցել հունիսի 23-ի գիշերը, Սմբատ Հակոբյանի հեռախոսն անջատված է եղել՝ միացնելով պարզել է, որ 15 բաց թողնված զանգեր ունի նույն համարից, զանգելով այդ համարին պարզել է, որ Ռուբեն Հայրապետյանն է:
Սմբատ Հակոբյանի հրապարակած սղագրությունը ներկայացնում ենք ստորեւ:
Ս. Հ. -Ռուբեն ջան, բարեւ, ի՞նչ կա: Հո՞, բան չի եղել, մի քանի անգամ զանգել ես:
Կարդացեք նաև
Ռ. Հ. – Սմբո՛, ինչ պտի լինի, էս ի՞նչ թազա թատրոն ես սարքել, հավաքել ես էդտեղ կապիկություն են անում:
Ս. Հ. –Ռուբե՛ն, չգիտեմ, թե ում համար է թատրոն կամ կապիկություն, այստեղ մարդիկ են հավաքվել կոնկրետ պահանջով, կոնկրետ հարցեր են դրել:
Ռ. Հ. – Արա՛, ի՞նչ հարց: Թարգը տո՛ւր, գնա՛ հանգիստ նստի տունդ, ոչ մի բանի մի՛ խառնվի:
Ս. Հ. – Ռուբե՛ն, նախ արա-ով մի՛ խոսի, երկրորդն էլ, եթե էդ թեմայով խոսելու բան ունես, կարող ենք ցերեկը հանդիպել. Խոսել:
Ռ. Հ. – Արախ՛, լսի՛՝ ինչ եմ ասում, ես քո հետ ինչ պիտի խոսամ, քեզ ասում եմ յան տո՛ւր, գնա նստի տունդ, թե չէ վաղը քո հետ ուրիշ մարդիկ կխոսեն ուրիշ ձեւ:
Ս. Հ. –Ուրեմն՝ հիմա լսի՝ ինչ եմ ասում, Ռուբե՛ն: Նախ դու չես, որ պիտի ասես՝ ես ինչ անեմ, հետո եթե որեւէ մեկը կփորձի այս հարցում ինձ հետ ուրիշ ձեւի խոսի, ուրիշ ձեւի պատասխան կստանա:
Ռ. Հ. –Արա, (հայհոյում է Ա. Չ.), քեզ ասում եմ գնա վեր ընգի տունդ, թե չէ կասեմ կբռնեն ոտերդ կջարդեն:
Ս. Հ. – Տո՛, (հայհոյում է Ա. Չ.): Բառերդ չափավորի եւ չափդ ճանաչի:
Ռ. Հ. -(Հայհոյում է Ա. Չ.): Հեսա կտեսնես գլուխդ ինչ ա գալիս:
Ըստ Սմբատ Հակոբյանի՝ այս խոսակցությունը եղելության սկիզբն է, նա կատարվածը քաղաքական հաշվեհարդար է համարում. «Ես ավելին ասեմ՝ սա ոչ թե հաշվեհարդար էր, սա իմ անձի եւ մեր տեսակի հանդեպ մահափորձ էր եւ քաղաքական մահափորձ էր սա: Հազար փառք աստծուն, որ օրգանիզմս շատ պինդ է կառուցել ու բախտս բերեց, որ ես կենդանի մնացի:
Լրագրողները հետաքրքրվեցին, թե Սմբատ Հակոբյանը խոսակցության սղագրությունը քննչական գործողությունների հետ կապ ունի՞ , նա պատասխանեց՝ ոչ, իր անձնական կապերով է ձեռք բերել եւ չի պատրաստվում բացահայտել, թե որտեղից է դա:
Ամի ՉԻՉԱԿՅԱՆ
