Էդուարդ Շարմազանովի կարծիքով՝ այն, որ համագործակցությունն անհրաժեշտ է, փաստ է
«Ամեն ինչ պետք է լինի օրենքի տառին եւ ոգուն համաձայն, որովհետեւ մեզ համար կարեւոր է, բնականաբար, մեծամասնությունը կողմ լինի սահմանադրական բարեփոխումների այս փաթեթին, բայց ոչ պակաս կարեւոր է, որպեսզի հանրաքվեն անցնի լեգիտիմ, լեգալ հանրաքվեի միջոցով եւ ամեն ինչ լինի միջազգային ժողովրդավարական չափանիշների համաձայն»,- հոկտեմբերի 19-ին ՀՀԿ Գործադիր մարմնի նիստից հետո լրագրողների հետ հանդիպման ընթացքում ասաց ՀՀԿ խոսնակ Էդուարդ Շարմազանովը:
Նա նշեց, որ քարոզարշավի ընթացքում Հանրապետականը պատրաստվում է մարզեր այցելել, հեռուստաարշավ, հեռուստատեսային բանավեճեր կազմակերպել, բայց մինչ այդ պետք է խորհրդակցեն այն քաղաքական ուժերի հետ, որոնք եւս կողմ են սահմանադրական փոփոխություններին եւ նոր վերջնականապես կձեւավորվի իրենց գրաֆիկը. «Առհասարակ, Հայաստանի Հանրապետական կուսակցությունը համագործակցության կողմնակից է, եւ տարօրինակ էլ կլիներ, որ մենք այլ ուժերի հետ չհամագործակցեինք»:
Նկատառմանը, թե ՀՅԴ-ն հայտարարել է, որ առանձին քարոզարշավ է իրականացնելու Էդուարդ Շարմազանովն ասաց. «Հայ հեղափոխական դաշնակցությունը առանձին քաղաքական ուժ է, ընդամենը կարող եմ ասել, որ նրանց որոշումը հարգանքի արժանի որոշում է. իրենք պետք է որոշեն՝ ինչպես վարվել: Բայց այն, որ համագործակցությունն անհրաժեշտ է եւ նաեւ Հայ հեղափոխական դաշնակցության հետ, դա փաստ է»:
Կարդացեք նաև
Անդրադառնալով Հայ ազգային կոնգրեսի հայտարարությանը, թե հանրաքվեն ապօրինի է, քանի որ Գագիկ Հարությունյանը ակտիվորեն լոբբինգ է իրականացնում՝ Էդուարդ Շարմազանովը ասաց. «Իմ արձագանքն է՝ Հայ ազգային կոնգրեսի այս հայտարարությանը ուշադրություն չդարձնել եւ հղում չանել, որովհետեւ իրականության հետ կապ չունեցող հայտարարություն է»:
Ամի ՉԻՉԱԿՅԱՆ
