ԱԺ պատգամավոր, «Ոչ»-ի քարոզչության շտաբի պետ Լեւոն Զուրաբյանը հոկտեմբերի 30-ին Ազատության հրապարակում «Չե՛ք անցկացնի» նախաձեռնության հանրահավաքի ընթացքում ներկայացրեց իրենց ծրագիրը եւ հետագա քայլերը: Ըստ որի նախատեսվում է երկրում կազմակերպել ակտիվ ոչ-ի քարոզ՝ ձեւավորելով պայքարի պատրաստ քաղաքացիների մի ամբողջ բանակ: Նախատեսվում է նաեւ ակտիվորեն պատրաստել հանրաքվեի օրինականության համար պայքարելու պատրաստ ավանգարդը եւ ապահովել նաեւ քաղաքական ուժերի, քաղաքացիական նախաձեռնությունների եւ հասարակական կազմակերպությունների լիարժեք համագործակցությունը: Ըստ Լեւոն Զուրաբյանի այդ համագործակցությունը թույլ կտա մինիմումի հասցնել ընտրակեղծիքները ընտրատեղամասերում:
«Այս բոլոր քայլերը արդյունավետ չեն լինի, եթե զուգահեռաբար երկրում չծավալվի ակտիվ հանրահավաքային պայքար: Մենք վստահ ենք, որ ակտիվ հանրահավաքային պայքարը եւ մասնակցությունը հանրաքվեին ոչ միայն միմյանց չեն խանգարում, այլ նաեւ միմյանց օգնում են: Ուստի՝ մենք կոչ ենք անում սկսել հանրահավաքային պայքարը՝ պատրաստ լինել ժողովրդի մոբիլիզացիայի հարցում համագործակցել բոլոր քաղաքական ուժերի հետ, որոնք ընդգրկվել են «Ոչ-ի» ճակատի մեջ, մասնավորապես՝ «Նոր Հայաստան» քաղաքական միավորման հետ»,- ասաց նա:
Լեւոն Զուրաբյանը նշեց, որ ժամանակն է, որ հանրահավաքների կազմակերպեն նաեւ քաղաքական ուժերը: Նա հայտարարեց, որ «Ոչ»-ի քարոզարշավի համատեղ շտաբը նոյեմբերի 20-ին ժամը 17:00-ին հրավիրում է Ազատության հրապարակ՝ հանրահավաքի. «Այդ հանրահավաքում մենք կներկայացնենք հանրաքվեի անցկացման եւ մեր պայքարի միջանկյալ արդյունքները եւ արդեն ժողովրդին կասենք, թե ինչպես ենք մենք դեկտեմբերի 6-ին ստանալու այն արդյունքը, որը պետք է մեր ժողովրդին»:
Կարդացեք նաև
Ամի ՉԻՉԱԿՅԱՆ
