Նախկին ԽՍՀՄ Խնայբանկում ներդրված դրամական ավանդատուների ժառանգներին կթույլատրվի ստանալ այդ ավանդների փոխհատուցումը:
Այս մասին տեղեկանում ենք կառավարության վաղվա նիստի օրակարգից:
Ըստ կառավարություն ներկայացրած նախագծի, ավանդների փոխհատուցման իրավունք ունեցող քաղաքացիների մահվան դեպքում, այդ իրավունքը փոխանցվում է ավանդատուի ժառանգներին անկախ նրանից, թե փոխհատուցման ցուցակում հաշվառված, բայց մահացած ավանդատուի գումարը համապատասխան մարմին փոխանցվել է, թե ոչ:
Ներկայումս ընդունված կարգի համաձայն, եթե ավանդատուն մահացել է եւ նրա տվյալները փոխհատուցման վճարման ցուցակում ներառվելուց եւ եթե գումարը համապատասխան մարմնին փոխանցվել է, ապա այս դեպքում է ժառանգորդն իրավունք ունենում ստանալ փոխհատուցումը: Կառավարությունը գտնում է, որ ներկայիս կարգը կոռուպցիոն ռիսկ է պարունակում, այսինքն, եթե նախատեսված փոխհատուցման գումարը տեխնիկական կամ ինչ-ինչ օբյեկտիվ կամ սուբյեկտիվ պատճառներով ուշ փոխանցվի փոստային ծառայությանը, ապա մահացած ավանդատուի ժառանգները կզրկվեն փոխհատուցում ստանալու իրավունքից:
«Անհրաժեշտ է փոխհատուցման ցուցակում հաշվառված ավանդատուի մահվան դեպքում, նախատեսված փոխհատուցման գումարը ստանալու իրավունքը տալ ժառանգներին` անկախ նրանից այդ գումարը համապատասխան մարմիններին փոխանցվել է, թե ոչ»,-նշված է նախագծում:
Վաղը կառավարությունը կորոշի՝ հավանություն տա՞լ այս նախագծին, թե՝ ոչ:
Նելլի ԲԱԲԱՅԱՆ
