ԱԺ ՀՀԿ խմբակցության պատգամավոր Լեւոն Մարտիրոսյանի գնահատմամբ, սահմանադրական փոփոխությունների հանրաքվեի քարոզարշավի ողջ ընթացքում բովանդակային քննարկում այդպես էլ չստացվեց:
«Որովհետեւ ոչ-ի ճամբարն այդպես էլ որեւէ լուրջ փաստարկ չբերեց, որ փոփոխությունների այս փաթեթը լավն ու առաջադիմական չէ: Հիմնական փաստն այն է՝ քանի որ հանրաքվեի նախաձեռնողը այսօրվա իշխանություններն են, ուրեմն վատն է, ուրեմն իշխանությունները չար նպատակ են հետապնդում վերարտադրվելու եւ այլ նպատակներ: Սա առաջադիմական փաթեթ է, տասնամյակներ շարունակ խոսել ենք խորհրդարանական համակարգին անցնելու անհրաժեշտության մասին, եւ նույնիսկ այն քաղաքական ուժերը, որոնք հիմա դեմ են արտահայտվում, խոսել են հարյուր տոկոս համամասնական ընտրակարգի անցնելու անհրաժեշտության մասին, կառավարման խորհրդարանական մոդելի մասին: Ոչ ասելով՝ մեր քաղաքացիները պետք է իմանան, որ սա ոչ այնքան այո-ի ու ոչ-ի քարոզարշավ է, այլ կամ- կամ-ի քարոզարշավ: Կամ կողմ ենք քվեարկում գործող սահմանադրությանը, կամ ընտրում առաջարկվող նոր առաջադիմական Սահմանադրությունը»,- այսօր «Հայացք» ակումբում ասաց ՀՀԿ-ական պատգամավորը:
Քաղաքական վերլուծաբան Ստյոպա Սաֆարյանն էլ հակադարձեց՝ այնպես չէ, որ այո-ի քարոզողները ներկայացրել են առավելություններ, ոչ-ի ճամբարը խուսափել է մտնել բանավեճի մեջ. «Եթե խոսել ենք համամասնական ընտրակարգի մասին, չենք խոսել կայուն մեծամասնության մասին, խոսել ենք անկախ դատական համակարգի մասին, որը մեր պատկերացմամբ այլ մոտեցումներով պետք է արվեր: Չենք խոսել մարդու իրավունքների համակարգում տոտալ հետընթացի մասին, ինչը կա առաջարկվող տարբերակում: Այսինքն, գործընթացն այնպես է տարվել, որ նույնիսկ խորհրդարանական համակարգի կողմնակիցները չեն կարող ասել այո, ինչպես՝ ես»:
Պատգամավորը հարցրեց՝ այսինքն կո՞ղմ եք գործող Սահմանադրությանը, պարոն Սաֆարյանն ասաց՝ գործող Սահմանադրությունն էլ իր սրտով չէ, բայց առաջարկվող Սահմանադրությանն էլ կողմ չէ, որովհետեւ իր համար ոչինչ չի փոխվելու. «Նոր սահմանադրությունն էլ չի փոխի ու չի բերի այն, ինչ ուզում էինք: Ինձ համար տարբերություն չկա՝ ուժի կենտրոնը մնում է Բաղրամյան 26-ում, թե՞ Մելիք Ադամյան է գալիս: Երկու Սահմանադրություններն էլ չունեն իշխանության տարանջատման, իշխանություններին զսպման մեխանիզմներ»:
Կարդացեք նաև
Լեւոն Մարտիրոսյանն էլ վստահեցրեց, որ աննախադեպ լիազորություններ ու իրավունքներ է տրվում խորհրդարանում ընդդիմադիր ուժերին. «Այս պահին ընդդիմությունը խորհրդարանում դերակատարում չունի, բացի խոսելուց»: Նա նաեւ հավելեց, որ շատ ոչ ասողներ այո են քվեարկելու, որովհետեւ չգիտեն՝ ինչին են ոչ ասում: Պարոն Սաֆարյանն էլ հակադարձեց՝ իսկ ձեզ շատ այո ասողներ, ոչ են քվեարկելու:
Արփինե ՍԻՄՈՆՅԱՆ
այսինքն ձեր ոչ – երը այո են սարքելու