Ռուսաստանի գլխավոր դատախազությունն այդ երկրում անցանկալի է ճանաչել երկու արտասահմանյան հասարակական կազմակերպությունների գործունեությունը: Այս տեղեկությունը հաղորդել է «Gazeta»-ն:
Խոսքը «Բաց հասարակություն» հիմնադրամի եւ «Բաց հասարակության աջակցության հիմնադրամ» ինստիտուտի մասին է: Երկու կազմակերպություններն էլ մտնում են Սորոսի հիմնադրամի մեջ, որը միջազգային բարեգործական կազմակերպություն է:
Նշված է, որ դատախազության որոշման համար հիմք է հանդիսացել Դաշնային խորհրդի դիմումը գլխավոր դատախազին, արտաքին գործերի եւ արդարադատության նախարարներին, որով խորհուրդը խնդրել է ստուգել կազմակերպությունները, որոնք ներառված են այսպես կոչված «հայրենասիրական ստոպ-ցանկում»:
«Պարզվել է, որ «Բաց հասարակություն» հիմնադրամի (Open Society Foundations) եւ «Բաց հասարակության աջակցության հիմնադրամ» ինստիտուտի (OSI Assistance Foundation) գործունեությունը վտանգ են ներկայացնում Ռուսաստանի Դաշնության սահմանադրական կարգի հիմքերին եւ պետության անվտանգությանը»,- ասվում է հաղորդագրությունում:
Կարդացեք նաև
Կայքը հիշեցրել է, որ Դաշնային խորհուրդն արտասահմանյան ՀԿ-ներով «հայրենասիրական ստոպ-ցանկ» է ուղարկել արդարադատության, արտաքին գործերի նախարարություններ եւ գլխավոր դատախազություն: Ցանկում ներառված են 12 ՀԿ-ներ, որոնք, պատգամավորների կարծիքով, անցանկալի են Ռուսաստանի տարածքում:
Պատրաստեց Աշոտ ԻՍՐԱԵԼՅԱՆԸ
