ՀՀ ՊՆ մամուլի խոսնակ Արծրուն Հովհաննիսյանը «Հայելի» ակումբում լրագրողների հետ հանդիպմանը հայտարարեց, որ այսօր սահմանին իրավիճակը հանգիստ է եղել և հույս հայտնեց, որ իրավիճակը աստիճանաբար կգնա դեպի հանդարտեցում՝ պայմանավորված քաղաքական իրավիճակով և Ադրբեջանում գոյություն ունեցող լարվածությամբ:
Սակայն պարոն Հովհաննիսյանը միևնույն ժամանակ շեշտեց. «Մենք չունենք խաղաղություն, մենք ունենք հարաբերական հանգիստ վիճակ»:
Այնուհետև լրագրողներին հորդորեց չօգտագործել «հրադադարի խախտում» եզրույթը. «Գաղտնիք չէ, որ չի մնացել մի փորձագետ ու մասնագետ՝ անգամ բանակից հեռու, որ այս իրավիճակը պատերազմ չգնահատի: Սա պատերազմ է: Կխնդրեի ձեր գրական տերմինաբանության մեջ օգտագործել պատերազմ բառը, և չօգտագործել «հրադադարի խախտում» բառը, քանի որ հրադադար այլևս չունենք»:
Անդրադառնալով Ադրբեջանի կողմից զինատեսակների փոփոխությանը, երբ հակառակորդը կրակում է արդեն տանկերից, պարոն Հովհաննիսյանը նկատեց. «Տանկի կրակոցը առանձնահատուկ այնքան մեծ ազդու չէ դիրքում մարտական ֆունկցիա կատարելիս, ինչքան հրետանին: Քանի որ տանկը միշտ առաջնագծում չի գտնվում, առանձնահատկությունն այն է, որ այն բերվել է առաջնագիծ: Այս տարի էսկալացիայի առումով ունենք Դ-30 հաուբիցների կիրառություն, որը շատ ավելի ազդու է և դրա կիրառությունը առաջնագծում ավելի վտանգավոր է, քան տանկերի»:
Կարդացեք նաև
Հարցին՝ ինչո՞ւ Ադրբեջանի ռազմական գործողություններին համապատասխան ռազմական հակահարված չի տրվում հայկական կողմից, պարոն Հովհաննիսյանը պատասխանեց. «Կարելի է տասը արկին մեկ արկով պատասխանել, բայց ավելի դիպուկ»:
Ըստ Արծրուն Հովհաննիսյանի՝ այնպես չէ, որ Ադրբեջանը նման տանկեր ու ծանր հրետանի սահմանին կիրառելով՝ ինչպես հաճախ հանրությունն է մեկնաբանում, իր առաջ դնում է մի քանի զինվոր վերացնելու հարցը, այլ, ավելին, նա իր առաջ ավելի լուրջ խնդիրներ է դնում, որոնք չեն ստացվում. «Ինչո՞ւ տրամաչափը հասցրեց Դ-30-ի, քանի որ նախորդ դեպքում ավելի հուժկու հակահարված էր ստանում, իր գերագույն խնդիրը տապալեց, հաջորդ անգամ տրամաչափը փորձում է մեծացնել»:
Ըստ Արծրուն Հովհաննիսյանի՝ ադրբեջանական կողմի զոհերի թիվը 15-ի սահմաններում է ու հավելեց. «Հիմա հստակ թվեր չեմ կարող ասել, բայց ավելի քան տասնհինգ զոհերի մասին է խոսքը: Տարվա վերջին կունենանք մոտավոր պատկերը հակառակորդի զոհերի և վիրավորների մասին: Տարբեր տեղեկությունների համաձայն՝ դրանք անցնում են 210-215-ը: Ադրբեջանի դեպքում նման վերջնական թվեր նշելը դժվար է, քանի որ հստակ քողարկում կա»:
Տաթև ՀԱՐՈՒԹՅՈՒՆՅԱՆ
