Այսօր կառավարության նիստում վարչապետ Հովիկ Աբրահամյանը Արմեն Երիցյանին, որը տարածքային կառավարման եւ արտակարգ իրավիճակների նախարարն է, հանձնարարեց պատժել մարզպետարանների անբարեխիղճ պաշտոնյաներին:
Վարչապետի խոսքերով, որ փետրվարի 2-ի կառավարությունում անցկացված խորհրդակցության ժամանակ լսվել են Արագածոտնի ու Կոտայքի մարզպետարանների սոցիալական ծառայությունների տարածքային գործակալություններում անցկացված Վերահսկիչ պալատի ուսումնասիրությունները. «Խորհրդակցության ընթացքում մենք շատ մանրամասն լսել ենք բոլոր կողմերին, մեզ համար անընդունելի են այն արդարացումները, որոնք հնչում էին խորհրդակցության ժամանակ, որոնց մեծ մասն անհիմն են: Հանձնարարում եմ Տարածքային կառավարման եւ արտակարգ իրավիճակների նախարար պարոն Երիցյանին մարզպետների հետ միասին քննարկել այդ հարցերը: Ես համոզված եմ, որ կան դեպքեր, որտեղ պետք է նաեւ ազատել այդ պաշտոնյաներին իրենց զբաղեցրած պաշտոններից»:
Նա նաեւ նշեց, որ իր համար ընդունելի է ՎՊ խորհրդի առաջարկությունը՝ մարզպետարանների բոլոր սոցիալական ծառայություններում իրականացնել ստուգումներ. «Դա այն ոլորտն է, որտեղ մենք պետք է արդարությունն ու անաչառությունն անպայման ապահովենք, ինչպես նաև մյուս բոլոր ոլորտներում»,- ասաց վարչապետը:
Լուսինե ԲՈՒԴԱՂՅԱՆ
Կարդացեք նաև
