Երեւանի Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում քիչ առաջ հրապարակվեց բանակում զոհված զինծառայողներ Արթուր Ղազարյանի եւ Վալերի Մուրադյանի մայրերի՝ Իրինա Ղազարյանի ու Նանա Մուրադյանի՝ ոստիկանների դեմ բողոքի գործով դատավճիռը։ Դատավոր Ռուբիկ Մխիթարյանը հայտարարեց, որ դատարանը որոշել է մերժել սեւազգեստ մայրերի բողոքը:
Հիշեցնենք, որ 2015թ. մայիսի 13-ին ոստիկանները բռնություն կիրառելով, նախագահականի դիմացից հեռացրել էին Իրինա Ղազարյանին եւ Նանա Մուրադյանին: Սեւազգեստ մայրերը ոստիկանների դեմ հաղորդում էին ներկայացրել: Հատուկ քննչական ծառայությունն այդ հաղորդման հիման վրա քրեական գործ էր հարուցել, սակայն հանցակազմի բացակայության պատճառաբանությամբ գործը կարճվել էր:
Իրինա Ղազարյանն ու Նանա Մուրադյանը դատական կարգով պահանջում էին ՀՔԾ կողմից հետապնդում չիրականացնելու եւ վարույթը կարճելու վերաբերյալ որոշումը վերացվի, եւ իրականացվի նոր՝ անաչառ քննություն:
Կարդացեք նաև
Դատավճռի հրապարակումից հետո Իրինա Ղազարյանը Aravot.am-ի հետ զրույցում դժգոհեց, թե ինչու պետք է իր տղան սպանվեր եւ ծնողն արդարության չհասներ. «Ինչի պետք է մենք մեր երեխեքի արդարությունը չիմանանք: Օհանյանը պատասխան չի տալիս, Սերժ Սարգսյանը պատասխան չի տալիս: Ո՞վ պետք է իմ երեխու պատասխանը տա: Ինչի՞ համար: Կարո՞ղ է ես իրենց համար եմ իմ երեխուն բերել պահել 10 տարի»:
Նանա Մուրադյանն էլ հայտարարեց, որ եթե դատավորն իշխանությունների պատվերը չկատարի, իր աթոռին չի նստի: «Դրա համար էլ ոնց հրամանը տալիս են, տենց անում են: Թող մեզ չտանեին-բերեին, քաշքշեին: Սկզբից էլ թող ասեին որոշումը»:
Սեւազգեստ մայրերը մեզ հետ զրույցում հայտարարեցին, որ անցնելու են բոլոր դատական ատյաններով: «Ես իմ Արթուրի մի կաթիլ արյունը սաղի քթերից հանելու եմ: Ես չեմ թողելու, որ ոչ մեկը մարսի»,- ասաց Իրինա Ղազարյանը:
Մանրամասները՝ տեսանյութում
Աշոտ ԻՍՐԱԵԼՅԱՆ
