Ստեփանավան խոշորացված համայնքի Գարգառ բնակավայրի 25/28 տեղամասում երեկ հիմնական մրցակցությունը իշխող «Քաղաքացիական պայմանագրի» և ընդդիմադիր «Ուժեղ Հայաստանի» միջև էր։ Նրանցից հետ չէր մնում վերջնարդյունքում հաղթանակ գրանցած «Գործարար» կուսակցությունը, որի ցուցակը գլխավորում էր գործող քաղաքապետ Արմեն Գրիգորյանը։
Այս տեղամասում ՔՊ-ն հաղթեց 328 ձայնով, երկրորդ տեղում «Ուժեղ Հայաստանն» էր՝ 198 ձայնով, երրորդ տեղում՝ «Գործարար» կուսակցությունը՝ 124 ձայնով։ Իշխանամերձ «Հանրապետությունը» 7 ձայն հավաքեց։
Տեղամասում 877 ընտրող է գրանցված։ Նրանցից 661-ը մասնակցեցին ընտրությանը։ Ու մինչ քվեարկության ավարտի վերջին կես ժամում բոլոր հանձնաժողովականները սրտատրոփ սպասում էին 660-րդ քվեարկողին, որպեսզի «թիվը կլոր» փակեն, ՔՊ-ի վստահված անձ Կարեն Զալինյանն ակտիվ հեռախոսային խոսակցությունների մեջ էր։ Ընդհանուր իրավիճակը հուշում էր՝ «ստուգողական» զանգեր էին։
ՔՊ-ի նախընտրական ցուցակը գլխավորող Արայիկ Ներսիսյանը Կարեն Զալինյանի 41 տարվա ընկերն է։ Մեր զրույցում Զալինյանն ասաց, որ իր համար սկզբունքը եղել է սա՝ որ ցուցակով իր 41 տարվա ընկերը կառաջադրվի, իր համար էական չէ, ինքն իր ընկերոջ կողքին է կանգնելու։Իսկ տեղամասում միևնույն է, չստացվեց «թիվը կլոր փակել»․ վերջին րոպեին 661-րդ ընտրողն էլ եկավ։
Մանրամասները՝ տեսանյութում
Նելլի ԳՐԻԳՈՐՅԱՆ
