Երեկ ԱԺ Էթիկայի հարցերով ժամանակավոր հանձնաժողովի նախագահ Խոսրով Հարությունյանը լրագրողներին բացատրել է, թե ինչու Շուշան Պետրոսյանի արտահայտությունր չի կարելի սպառնալիք ընդունել, եւ նա չի խախտել հանձնաժողովի համապատասխան կետը։ Բացատրությունը սպանիչ է. հաշվի է առնվել այն հանգամանքը, թե այդ խոսքերի հեղինակն ով է, ինչ կերպար է. «Ո՞վ է այդ մարդը. մշակույթի ներկայացուցիչ, վաստակավոր գործիչ եւ իր արժեհամակարգով բոլորովին այլ համակարգի տեր մարդ»։
Հիմա մեր ամբողջ օրենսդրությունը պետք է փոխել, պետք է մարդկանց տեսակավորել, վարկանիշային աղյուսակ կազմել, եւ օրենքը կիրառելիս հաշվի առնել այդ վարկանիշները։ Որքան մարդու «սորտը» բարձր է, այնքան նա իրավունք կունենա վիրավորել եւ հայհոյել։ Որքան ցածր վարկանիշ ունի, այնքան պատիժը պետք է խիստ լինի։
2-3 տարի առաջ Հնդկաստանում մի զավեշտական դեպք էր տեղի ունեցել։ Մի հնդիկ իր բջջային հեռախոսով սխալմամբ ուրիշին էր զանգել։ Այդ ուրիշն էլ ավելի բարձր կաստայի ներկայացուցիչ էր եղել։ Հավաքվել, եկել եւ այդ խեղճ հնդիկին դաժանաբար ծեծել էին, քանի որ վերջինս՝ թեկուզ ոչ միտումնավոր, խոսել էր ավելի բարձր կաստայի ներկայացուցչի հետ, ինչը ահավոր «զապադլո» է բարձր կաստայի համար։
Հիմա մեզ մոտ կարծես թե նմանատիպ կաստաներ են ձեւավորվում։ Շուշան Պետրոսյանը, որքան հասկացանք, այսուհետ հանդիսանում է ամենաբարձր՝ իշխանական կաստայի ներկայացուցիչ, որը կարող է հայհոյել, վիրավորել, սպառնալ ցածր կաստայի կամ ռամիկ ժողովրդի ներկայացուցիչներին։ Մանավանդ որ ինքը բոլորովին այլ արժեհամակարգի տեր մարդ է։
Կարդացեք նաև
Մհեր ՂԱԼԵՉՅԱՆ
Հոդվածն ամբողջությամբ կարող եք կարդալ «Չորրորդ իշխանություն» թերթի այսօրվա համարում
